I nderuar zoti President,

Më dt.06.01.2003 shkuan në Korçë për të bërë verifikimin e vdekjes së papritur të qytetarit Gazmend Tahirllari nga fshati Goskovë e poshtme, zotërinjtë Jorgo Dhrami dhe Admir Moisiu. Sipas televizioneve private, shtypit e medias në përgjithësi, bëhej fjalë se vdekja e këtij personi ishte rezultat i keqtrajtimit të bërë nga policia e rrethit Korçë. Po kështu, sipas medias, vdekja e këtij personi, kishte ndodhur gjatë kohës që ai ishte marrë në komisariatin e policisë së rrethit Korçë.

Për verifikimin e këtij problemi serioz dhe delikat, u muar takim me prokurorin e rrethit, policinë, ekspertin mjeko-ligjor si dhe mjekët e spitalit civil Korçë të cilët ishin marrë me shërimin e tij. Nga marrja e këtyre takimeve si dhe pyetja e disa perosnave përfshirë këtu dhe ata persona që akuzohen si fajtorë, në përfundim rezultoi:

Më dt.31.12.2002, Gazmend Tahirllari ka patur një konflikt me bashkëshorten e tij. Kjo e fundit, mbasi nuk ka duruar ekzistencën e mëtejshme të gjëndjes konfliktuale me bashkëshortin e vet, ka vendosur dhe është larguar nga familja, duke shkuar në familjen e saj të vajzërisë, në një fshat të Devollit Korçë. Udhëtimin e saj ajo e ka siguruar nëpërmjet një taksisti të fshatit Goskovë, Mustafa Sejdarasi.

Gazmend Tahirllari mbasi ka konstatuar largimin e bashkëshortes së vet si dhe faktin që transportimin e saj e ka bërë bashkëfshatari i tij Mustafa Serjdarasi, ka kapur këtë të fundit të nesërmen, dt.01.01.2003 dhe ka shkëmbyer replika me të. Po në këtë ditë, Gazmend Tahirllari (viktima), ka shkuar në banesën e Mustafa Sejdarasit, dhe në shkallët e hyrjes së tij të shtëpisë ka vendosur një fishek luftarak. Këtë veprim të tij, taksisti Mustafa Sejdarasi e ka konstatuar kur ka shkuar në banesën e tij. Megjithatë, këtij veprimi nuk i ka kushtuar ndonjë rëndësi të veçantë.

Më dt.02.01.2003, taksisti Mustafa Sejdarasi, ka konstatuar se në oborrin e tij ishin vendosur nëpër vënde të ndryshme, 16 copë fishekë luftarak, në gjendje përdorimi, si dhe xhamin e thyer të derës së banesës dhe gurin që e kishte thyer atë. Veç kësaj, sipas tij, ka parë Gazmend Tahirllarin duke ikur me vrap. Në këto rethana Mustafa Sejdarasi ka vënë në dijeni kryeplakun e fshatit Goskovë e Poshtme, Nevruz Sejdarasin, dhe të dy sëbashku kanë shkuar në Komisariatin e policisë të rrethit Korçë, për të bërë denoncimin ndaj Gazmend Tahirllarit. Si officer roje në Komisariatin e Policisë, në këtë rast ka qënë oficeri i policisë gjyqësore Lorenc Balliu. Ky i fundit mbasi ka marrë denoncimin e përmëndur më sipër së bashku me inspektorin e policisë për zonën e fshatit Goskovë etj, Dashnor Ganolli dhe një person tjetër të policisë, po këtë ditë kanë shkuar në fshatin Goskovë për të takuar dhe shoqëruar për në polici, Gazmend Tahirllarin. Sa kanë shkuar në oborrin e banesës së Gazmendit, e kanë gjetur atë në këtë oborr, dhe i kanë bërë thirrje që të shkonte sëbashku me ta në Komisariatin e policisë të rrethit Korçë, si person i shoqëruar për të sqaruar rrethanat që përmëndeshin në denoncimin e mësipërm. Gazmend Tahirllari nuk i është bindur kësaj thirrjeje, por ka shkëmbyer replika me fjalë ofenduese, si dhe ka paraqitur pretendimin që nuk mund të shkonte me ta në Korçë, sepse fëmijët e vegjël nuk kishte person tjetër ti mbante.

Në këto kushte, oficeri i policisë gjyqësore, Lorenc Balliu, e ka mirëquajtur të pranuar pretendimin e tij si dhe për të mos acaruar këtë gjëndje, i ka bërë të ditur që Gazmendi, të paraqitej ditën e nesërme në polici, në orën 8.00 të mëngjesit.

Meqenëse Gazmend Tahirllari nuk ka shkuar nëpolici në dt.03.01.2003, sipas kërkesës së bërë nga personi i mësipërm, Lorenc Balliu, ka pritur se mos ndoshta ai mund të vinte më vonë.

Po më dt.03.01.2003, inspektori i policisë së zonës, Dashnor Ganolli, sëbashku me bashkëshorten e vet dhe djalin e tij dhe me një çift të rrethit miqësor të tij, kanë shkuar në fshatin Goskovë e Poshtme, për të bërë vizita me rastin e Vitit të ri, miq dhe shokë të tyre. Mbasi ka mbaruar vizitat së bashku me bashkëshorten dhe djalin e tij, ka marrë rrugën për t’u rikthyer në Korçë me mikun e tij Ilir Buna, me të cilin i kishte bërë edhe vizitat, me autoveturën e këtij të fundit. Në të dalë të fshatit Goskovë, i ka dalë përpara autoveturës Gazmend Tahirllari dhe ka kërkuar ndalimin e saj. Inspektori i policisë Dashnor Ganolli, duke menduar se Gazmendi mund ta donte për ti dhënë sqarime rreth mosvajtjes së tij në Komisariatin e policisë Korçë, i ka thënë drejtuesit të autoveturës të ndalonte. Mirëpo, sa është bërë ndalimi i autoveturës, Gazmend Tahirllari ka shkuar tek kjo autoveturë dhe mbasi ka hapur derën e saj, ka kapur për gjoksi inspektorin e policisë, Dashnor Ganolli, e ka kërcënuar për jetën si dhe fyer e sharë në drejtim të moralit të bashkëshortes e familjes së tij. Dashnor Ganolli, të paktën siç rezultoi nga verifikimet tona, nuk i është kundërpërgjigjur, por aty rreth orës 14.45-14.50, ka marrë në telefon oficerin e policisë gjyqësore z. Lorenc Balliu, të cilin e ka vënë në dijeni për çka ndodhi. Ky i fundit i është përgjigjur që inspektori i policisë së zonës, Dashnor Ganolli, të vazhdonte rrugën për në Korçë sëbahsku me bashkëshorten e personat e tjerë, sepse me këtë çështje do të merrej vetë ai.

Në këto kushte Lorenc Balliu sëbashku me grupin e gatshëm ka shkuar në fshatin Goskovë e Poshtme, për të takuar dhe shoqëruar për në polici Gazmend Tahirllarin. Sa ka shkuar para banesës së këtij të fundit, ka parë Gazmendin në oborrin e shtëpisë së tij, dhe për këtë i ka bërë thirrje që të shkonte sëbashku me të në polic. Ky i fundit, pra Gazmendi, nuk i është bindur kësaj thirrje, por mbasi ka gjetur rastësisht një kazmë në oborrin e tij, e ka marrë këtë dhe nëpërmjet saj ka tentuar të godasë Lorenc Balliun e shoqëruesit e tij. Kazma nuk e ka kapur Lorencin, mbasi ky është mënjanuar. Atëherë, Gazmend Tahirllari, u ka lëshuar qenin që mbante në shtëpi për t’i trëmbur ata. Duke përfituar nga kjo situatë, si dhe ekzistenca e një porte nga ana e mbrapme e shtëpisë së tij, ka mundur të largohet me shpejtësi dhe të marrë drejtimin e kodrave përpjetë të fshatit të tij Goskovë.

Lorenc Balliu sëbashku me trupat e gatshëm që e shoqëronin, për të trëmbur Gazmendin, ka shtirë disa herë me pistoletën e tij në ajër, mirëpo Gazmendi në vënd që të qëndronte largohej më shumë me shpejtësi. Kjo gjëndje ka vazhduar për gati reth 1 km, dhe mandej Lorenci sëbashku me personat e tjerë të policisë, kanë mundur ta kapin Gazmendin, ta prangosin me duar nga mbrapa si dhe ta marrin me vehte për ta çuar me makinën e tyre të policisë të tipit fugon, e cila ndodhej në fshatin Goskovë në Korçë.

Në momentin që Gazmend Tahirllari do të futej nga policia në fugonin e përmëndur më sipër, ka asistuar dhe babai i tij Hasan Tahirllari, i cili duke parë këtë gjëndje të djalit të tij, që sipas tij fytyra e tij ishte e mbuluar e tëra me gjak, ka tentuar dhe ka mundur që të futet edhe ky në këtë fugon për të shoqëruar djalin e tij Gazmendin deri në Korçë. Mbasi është future edhe ky në fugon, inspektori i policisë së zonës Dashnor Ganolli, i cili mbasi kishte çuar familjen në Korçë, ishte rikthyer në fshatin Goskovë, dhe në këtë moment u gjend edhe ai së bashku me policinë, ka hipur lart në fugon dhe ka detyruar të zbriste nga fugoni babanë e Gazmendit, Hasan Tahirllarin. E ka zbritur për tokë.

Hasan Tahirllari në drejtim të inspektorit të policisë së zonës Dashnor Ganolli, për këtë moment, ka pretendime se para se të zbritej në tokë nga Dashnori, ky i fundit e ka goditur mbi veshin e majtë të kokës me pistoletën e tij nga pjesa e hekurt, duke i shkaktuar një hematomë të madhe.

Mbasi kanë zbritur Hasan Tahirllarin në tokë, policia është nisur me fugonin e bërë fjalë më lart, për në komisariatin e policisë Korçë. Para se të shkonin në Komisariat, para Bashkisë së rrethit Korçë, Gazmend Tahirllari ka vjellë dhe ka kaluar në një gjëndje të rëndë shëndetësore. Për këtë, policia nuk e ka çuar në komisariat, por në spitalin civil Korçë. Këtu është marrë nga mjekët përkatës, i janë bërë shërbimet e ndryshme mjekësore nga një grup prej 5 mjekësh, me qëllim që të dilte nga kjo gjëndje. Mirëpo në vënd që Gazmend Tahirllari të dilte nga kjo gjendje, ai po keqësohej më tepër, deri në atë masë sa me të nuk mund të komunikohej më. Të nesërmen në mëngjes aty rreth orës 8.30 të dt.04.01.2003, Gazmend Tahirllari ka vdekur.

Mbi bazën e kërkesës së prokurorisë Korçë, është bërë ekspertimi i viktimës Gazmend Tahirllari për të përcaktuar shkakun e vdekjes. Sipas mjekut ligjor Enriko Trebicka, në trupin e viktimës janë gjetur disa hematoma rreth buzës së sipërme dhe të poshtme të kokës së viktimës dhe në kurrizin e hundës e një gërvishtje në këmbën e majtë. Po kështu është konstatuar që viktima ka pasë përdorur më parë pije alkoolike, e cila kjo është depozituar në bluzën e Gazmendit gjatë kohës që ai ka vjellë. Përpara këtyre rrethanave, mjeku legjist i Korçës, nuk ka bërë aktin e ekspertimit, mbasi ai ka marrë pjesë të brëndshme nga trupi i viktimës, dhe ja ka kaluar mjekësisë ligjore Tiranë, për të përcaktuar nëse shkaku i vdekjes është ose jo rrjedhojë e përdorimit të pijes alkoolike. Si hetimet ashtu dhe verifikimet tona kanë mbetur në këtë gjëndje, mbasi pritet përgjigja nga ana e mjekësisë ligjore Tiranë.

Meqenëse para nesh Hasan Tahirllari paraqiti pretendime të përdorimit të dhunës nga ana e inspektorit të policisë së zonës Dashnor Ganolli, i kërkuam nëpërmjet vendimit, ekspertit mjeko ligjor Korçë, z. Enriko Trebicka të ekspertonte personin në fjalë për të përcaktuar nëse në trupin e tij ndodheshin ose jo shenja dhune dhe nëse po të ç’karakteri e në ç’kohë janë krijuar ato. Në praninë tonë eksperti në fjalë, mbikqyri Hasan Tahirllarin, tek i cili konstatoi që në zonën laterale të anës së majtë të ballit, parallel me favoritin e flokëve, shifet një ekimozë në formë ovale, me drejtim vertical, me përmasa rreth 5x2.5 cm në qëndër me ngjyrë vishnje dhe në periferi në ngjyrë të verdhë. Sipas aktit të ekspertimit kjo ekimozë është shkaktuar me një mjet të fortë jo të mprehtë dhe propabilisht para rreth 3-4 ditësh. Kjo ekimozë hyn në kategorinë e rrafjeve.

Në këto kushte, verbalisht i kërkuam prokurorit të rrethit Korçë nisjen e hetimeve për shpërdorim të detyrës ndaj inspektorit të policisë së zonës, Dashnor Ganolli. Kjo, edhe për faktin tjetër se ky punonjës policie, ka vepruar në kundërshtim me përmbushjen e rregullit të detyrës së tij të caktuar me ligj, mbasi ai në rastin konkret e ka humbur cilësinë e përfaqësuesit të policisë në raport me Gazmend Tahirllarin dhe Hasan Tahirllarin, sepse në drejtim të Gazmend Tahirllarit ai ka paraqitur ankim në formë denoncimi, dhe sipas tij është në pozicionin e të dëmtuarit akuzues. Në këto kushte, ai nuk duhej të merrej me këtë çështje dhe për më tepër të kryente veprime aktive në dëm të familjes Tahirllari. Pra, ai ndaj kësaj familjeje, ligjërisht kishte humbur cilësinë e përfaqësuesit të policisë.

Ndonëse kërkesa jonë u bë verbalisht, prokurori i rrethit Korçë e mori parasysh kërkesën tonë dhe për këtë do të zhvillojë hetimet e nevojshme.

Sikundër ju shpjeguam edhe verbalisht, situata në familjen e viktimës, është mjaft e acaruar, ata u shprehën se do të hakmerren ndaj policisë në rast se shteti nuk e zgjidh drejtësisht çështjen e vdekjes së djalit të tyre Gazmend Tahirllari.

Nga marrja e takimit me ta, familja Tahirllari falenderoi disa herë rrjesht Institucionin e Avokatit të Popullit si për shkuarjen tonë atje ashtu dhe për veprimet që u kryen nga ana e jonë në prani të tyre. Ndaj institucionit tonë ata shprehën veç respektit dhe një besim absolut në mënyrën e zgjidhjes, duke thënë që kemi besim se këtë çështje do ta zgjidhni drejtësisht.

Në përfundim deshëm të shtojmë që mbi kërkesën tonë në rast se do ta lipte nevoja çvarrimin dhe ekzaminimin e viktimës Gazmend Tahirllari, familja e tyre ishte e të njëjtit mendim si dhe po ta lipte nevoja, ky veprim të bëhej në prani të tyre. Edhe prokuroria ishte e këtij mendimi nëse nevoja do ta lypte një gjë të tillë. Ekzumimi i kufomës, kuptohet të kryhet nga ekspertët mjeko ligjor të Tiranës.

Për gjithshka sa trajtuam më lart, e kemi në mënyrë të dokumentuar si me procesverbalet e mbajtur nga ana jonë, ashtu dhe kartela klinike nr.118 që i përket viktimës Gazmend Tahirllari, si dhe dy urdhërat për pezullimin nga puna në polici të oficerit të policisë gjyqësore Lorenc Balliu dhe inspektprit të policisë së zonës, Dashnor Ganolli.

Sot në disa gazeta shkruhet se është pushuar nga puna një mjek në spitalin e Korçës që ka pritur i pari viktimën, për shkak se ka plotësuar kartelën e tij, dhe është shprehur për pafajësinë e policisë. Edhe kjo do verifikohet.

Hetimet tona vazhdojnë.

Duke besuar në mirëkuptimin tuaj,

AVOKATI  I  POPULLIT

        Ermir  DOBJANI