Zj. Kryetare e Parlamentit,

          Dihet prej vitesh që vendi ynë ka patur dhe ka mbipopullim të burgjeve. Për këtë arsye mjaft persona të dënuar me vendime gjyqësore të formës së prerë kanë qëndruar dhe vazhdojnë të qëndrojnë për periudha të gjata nga disa muaj deri 1-2 vjet në qelitë e paraburgimit të komisariateve të policisë. Nga ana jonë shpesh herë është arritur të ndërhyhet dhe Drejtoria e Përgjithshme e Burgjeve i ka tërhequr nga dhomat e izolimit pranë komisariateve për në burgje. Por faktikisht pothuajse gjithë të dënuarve, që ndodhen akoma nëpër burgje ju është shkelur e drejta, sepse koha e qëndrimit në dhoma paraburgimi, pasi vendimi i tyre ka marrë formë të prerë, nuk ju është llogaritur si një ditë e gjysëm burgim.

          Mbajtja e të dënuarve në këto kushte është një shkelje e rëndë e të drejtave të tyre, e cila jo vetëm që ndikon në shëndetin e tyre, por ka cënuar edhe të drejta të tjera si komunikimet me familjet, ajrimin, komunikimet dhe marrjen e informacionit etj, që janë parashikuar si nga legjislacioni ynë dhe konventat ndërkombëtare për të burgosurit.  Ne e kemi ngritur këtë çështje që në vitin 2003 Ministria e Drejtësisë e ka pranuar çështjen në parim, por ka patur synim që ta përfshinte këtë ndryshim në një paketë të veçantë ndryshimi të legjislacionit penal. Por faktikisht që nga vitit 2004 nuk ka paraqitur ndonjë projekt për të rregulluar këtë problem, që do zgjidhte ankesat e drejta të të dënuarve.

          Për të zgjidhur këtë çështje një grup deputetësh kanë ndërmarrë një inisiativë legjislative mbi bazën e propozimit të Avokatit të Popullit. Ndryshimi i ligjit zgjidh ankesat e të dënuarve që kanë qëndruar në dhomat e paraburgimit, pasi vendimi i tyre ka marrë formë të prerë, duke jua llogaritur këtë kohë një ditë e gjysëm burgim për çdo ditë qëndrimi në paraburgim.

          Duke besuar në mirëkuptimin tuaj, bashkëlidhur po ju dërgojmë propozimin e grupit të deputetëve, për ta futur në proçedurën parlamentare.

                                                              Me respekt  

AVOKATI  I  POPULLIT

        Ermir  DOBJANI