Në përputhje me Kushtetutën dhe me Ligjin “Për Avokatin e Popullit” pranë Institucionit tonë vepron seksioni i veçantë, që ndër të tjera trajton edhe ankesat për Policinë. Ky seksion ka trajtuar me rigorozitetin më të madh çdo ankesë apo kërkesë që kanë bërë qytetarët ndaj Policisë, por edhe ankesat e vetë punonjësve të Policisë.

I.       Numri i ankesave, mënyra e përfundimit dhe ndarja e tyre sipas drejtimeve.

Gjatë periudhës kohore 2000-2004 për sektorin e Policisë (M.R.Publik dhe Policia e Shtetit) kanë ardhur 960 ankesa. Nga këto, 366 janë bërë nga banorë të rrethit Tiranë, ndërsa 594 janë bërë nga banorë të rretheve të tjera.

Mënyra e përfundimit të tyre ka qënë: 314 ose rreth 33 % e tyre janë zgjidhur në favor të ankuesve; 197 kanë qënë jashtë juridiksionit të Avokatit të Popullit kurse 449 kanë qënë të pabazuara.

          Ankesat e ardhura janë ndarë sipas këtyre drejtimeve:

- 228 ose rreth 24 % e tyre kanë qënë për keqtrajtime të shtetasve nga punonjësit e policisë;

- 370 ose rreth 38 % e tyre kanë qënë për veprime arbitrare te punonjësve te policisë ndaj shtetasve si: për kontrolle të paligjshme banese e lokali; arrestime, ndalime dhe shoqërime të paligjshme; për veprime korruptive; për mos evidencim apo mos ndjekje të kallzimeve apo të ankesave; për gjoba të padrejta; për mosdhënie apo bllokim të pasaportave; bllokime e sekuestrime të automjeteve e sendeve te ndryshme nga policia; mos lejimi i avokatëve të takohen me personat e arrestuar apo ndaluar në polici dhe për veprime të tjera të kundërligjshme;

- 132 ose rreth 14 % e tyre kanë qënë për largime të padrejta nga detyrat e punonjësve të policisë;

- 70 ose rreth 7 % e tyre kanë qënë për mosekzekutim të vendimeve gjyqësore nga M.R.Publik dhe Policia e Shtetit dhe,

- 160 ose rreth 17 % e tyre kanë qënë për mosdhënie të urdhërave të lirimit apo të vërtetimeve të ndryshme, për problemet e shtetësisë e të tjera.

II.              Ankesat për keqtrajtime dhe qëndrimi ynë ndaj tyre.

          Ndjekja dhe trajtimi i ankesave për keqtrajtime ka qënë në qëndër të vëmëndjes së Institucionit tonë, pasi dhunimi i shtetasve nga Policia përbën një nga shkeljet më të rënda dhe më të ndjeshme të të drejtave të njeriut në kohën e sotme. Nga 228 ankesa të ardhura për keqtrajtime, në 47 raste kemi mundur të provojmë pretendimet e ankuesve.

Në të gjitha rastet e provuara, si për keqtrajtimet, ashtu edhe për rastet e kryerjes se veprimeve arbitrare nga punonjësit e policisë kemi bërë rekomandime për dhënien e masave disiplinore. Ndërsa në disa raste të tjera, kur veprimet e punonjësve të Policisë përmbanin elementët e figurës së veprës penale, kemi bërë rekomandime në organin e Prokurorisë për fillimin e ndjekjes penale. Gjithsej janë ndëshkuar rreth 100 punonjës policie.

Kështu, gjatë kësaj periudhe kohore nga ana jonë janë bërë 43 rekomandime për dhënie masash disiplinore, të cilat janë pranuar të gjitha. Mbi bazën e tyre janë ndëshkuar 54 punonjës policie, nga të cilët 30 oficere dhe 24 policë. Nga masat e mara mund të përmëndim përjashtimin nga Policia e Shtetit të 6 punonjësve të saj, nga të cilët një oficer; 6 pezullime nga detyra; 9 raste të shkarkimit dhe uljes në detyrë; 12 vërejtje me paralajmërim dhe 21 vërejtje.

Gjithashtu, gjatë kësaj periudhe kohore janë bërë edhe 21 rekomandime për fillimin e ndjekjes penale ndaj punonjësve të Policisë, nga të cilat janë pranuar 19 dhe janë refuzuar 2. Nga këto, 16 rekomandime janë bërë për fillimin e ndjekjes penale ndaj 31 punonjësve të Policisë të identifikuar me emra konkret, ndërsa 5 rekomandime janë bërë për fillimin e ndjekjes penale ndaj 4 grupeve të punonjësve të Policisë dhe 1 ndaj punonjësve të Gardës së Republikës të pa identifikuar me emra. Si rezultat i punës tonë janë deklaruar fajtorë dhe dënuar penalisht nga organet gjyqësore me vendim të formës së prerë 8 punonjës policie, nga të cilët 7 me burg dhe 1 me gjobë.

            Duhet të theksojmë faktin, se si rezultat i reagimeve aktive dhe qëndrimit tonë konseguent, ankesat për keqtrajtime të shtetasve nga Policia kanë ardhur në rënie të konsiderueshme nga viti në vit.

III.    Rekomandimet e bëra  nga Avokati i Popullit dhe qëndrimi i mbajtur ndaj tyre.

Për rivendosjen në vend e të drejtave të shkelura ankuesve, nga ana jonë janë bërë 115 rekomandime organeve të M.R.Publik, të Policisë së Shtetit, Prokurorisë dhe organeve të tjera të administratës shtetërore, nga të cilat rreth 90 % e tyre janë pranuar.

Me rekomandimet tona kemi bërë të mundur të rikthejmë në punë dhe në shkollën e Policisë 25 persona, si dhe janë ekzekutuar 20 vendime gjyqësore. Ndërsa 8 rekomandime për kthimin në punë të punonjësve të policisë nuk janë pranuar, si bie fjala per Ndrea Prendin, Roland Tego, Roland Çomo, Hasan Barmeta, Edmond Pepkola, Sokol Myrto, Bardhyl Kaçorri, Vladimir Memko. Disa nga këto rekomandime janë bazuar edhe në vendimet gjyqësore që kanë vendosur rikthimin e tyre në punë.

                Është e rëndësishme të theksojmë se në disa raste, nga trajtimi i ankesave të individëve të veçantë, nëpërmjet rekomandimeve kemi bërë të mundur zgjidhjen e problemeve të një numri të madh personash, të cilët megjithëse nuk kishin bërë ankesa, u cënoheshin të drejtat dhe interesat e tyre të ligjëshme. Kështu mund të përmëndim rekomandimin e bërë për problemin e gradave të punonjësve të policisë së Shtetit dhe atë për pajisjen me pasaporta të shtetasve shqiptarë me banim jashtë shtetit.

          IV.          Rekomandimet e bëra në fushën legjislative

Gjatë kësaj periudhe kohore nga ana jonë janë bërë edhe disa rekomandime dhe propozime në fushën legjislative. Kështu mund të përmëndim:

1. Propozimin bërë ish Kryeministrit dhe Komisionit Parlamentar të Ligjeve për bërjen e disa ndryshimeve Ligjit Nr. 8388, dt. 5.8.1998 “Për grumbullim e armëve dhe municioneve luftarake”. Në fakt, Parlamenti e zgjati afatin e veprimit të këtij Ligji.

2. Rekomandimi bërë Komisionit Parlamentar të Ligjeve dhe atij të  të Drejtave të Njeriut për të marrë inisjativën legjislative për ndryshimin dhe përmirësimin e nenit 4 të ligjit Nr. 8292, dt. 25.02.1998 “Për forcat speciale dhe ato të ndërhyrjes së shpejtë” me qëllim që të mos pengohet prokuroria për zhvillimin e hetimeve dhe vënien para përgjegjësisë të çdo polici të këtyre forcave që shkel ligjin dhe të drejtat e njeriut. Komisionet Parlamentare e mirëpritën rekomandimin tonë dhe e dërguan propozimin e tyre në Parlament, por ai nuk e miratoi atë.

3. Propozimi drejtuar Qeverisë dhe ish Ministrit të Rendit Publik, për të përmirësuar V.K.M. Nr. 552, datë 27.11.1999, “Për trajtimin ekonomik e financiar të familjarëve të punonjësve të policisë të vrarë e plagosur për shkak të detyrës”. Megjithëse e kemi përsëritur disa herë, dhe megjithë premtimet e bëra nga ish qeveritarët, familjet e policëve të vrarë dhe plagosur para vitit 1999 diskriminohen.

4. Propozimi drejtuar Qeverisë për ndryshimin e V.K.M Nr. 64, datë 02.02.2001 “Për inkuadrimin e gradave ushtarake, në gradat e Policisë së Shtetit dhe për caktimin e funksioneve organike, që do të ushtrohen sipas tyre”, i cili pavarësisht se nuk u pranua pati efektet e tij pozitive. Pas ndërhyrjes tonë u bë i mundur korigjimi i shumë rasteve të dhënies së gradave në mënyrë të padrejtë.

            5. Rekomandimi për të deklaruar (konstatuar) pavlefshmërinë absolute të Urdhërit të Kryeministrit Nr. 226, datë 20.08.2002 “Për komunikimin me organet e medias së shkruar dhe elektronike”, i cili u pranua.

6. Rekomandimi drejtuar ish Ministrit të Rendit Publik për të zgjatur afatin e pranimit të ankesave të punonjësve të policisë për gradat. Mbi këtë bazë Komisioni i Shqyrtimit të Ankesave mori në shqyrtim 1373 ankesa të punonjësve të policisë të rolit bazë, nga të cilat 1216 u zgjidhën pozitivisht. Ky komision mori në shqyrtim edhe 649 ankesa të punonjësve të policisë të rolit të mesëm e të lartë, nga të cilat 384 u zgjidhën pozitivisht. Gjithashtu, për të bërë të mundur rivendosjen në vënd të të drejtave së punonjësve të policisë që kishin bërë ankim për gradat jashte afatit për shkak të frikës së largimit nga Policia, i rekomanduam ish Ministrit të Rendit Publik ndryshimin e Urdhërit të Ministrit të Rendit Publik Nr. 1484, datë 18.06.2001, pika 14 dhe Urdhër-Shërbimit Nr. 1172, datë 04.04.2003, të Drejtorit të Përgjithshëm të Policisë së Shtetit, pika 8, duke zgjatur afatin e pranimit të ankesave të punonjësve të policisë për gradat, deri më 31.12.2004. Rekomandimet u pranuan.

7. Rekomandimi drejtuar ish Ministrit të Rendit Publik për përmirësimin e Urdhërit Nr. 1661, dt. 08.04.2002 “Për komunikimin me mediat”, i cili nuk është pranuar, megjithëse ky urdhër bie në kundërshtim me  nenin 22, pika 1 e Kushtetutës së Republikës së Shqipërisë, ku thuhet se: “Liria e shprehjes është e garantuar”. Gjithashtu ai është nxjerrë në kapërcim të kompetencave ligjore të Ministrit, sepse në bazë të nenit 17 të Kushtetutës, “Kufizime të të drejtave dhe lirive të parashikuara në këtë Kushtetutë mund të vendosen vetëm me ligj për një interes publik ose për mbrojtjen e të drejtave të të tjerëve. Kufizimi duhet të jetë në përpjestim me gjëndjen që e ka diktuar atë. Këto kufizime nuk mund të cënojnë thelbin e lirive dhe të të drejtave dhe në asnjë rast nuk mund të tejkalojnë kufizimet e parashikuara në Konventën Europiane për të Drejtat e Njeriut”. Në të njëjtën kohë ai nuk përputhet me bazën ligjore në të cilën është mbështetur, si dhe në qëllimin për të cilin është nxjerrë “në interes të rritjes së transparencës të M.R.Publik me median dhe me publikun”, sepse: së pari, në asnjë dispozitë të akteve normative në të cilat është mbështetur urdhëri, nuk kufizohet e drejta e punonjësve të policisë të komunikojnë me mediat dhe për problemet (ankesat) personale dhe së dyti, ky urdhër nuk i shërben rritjes së transparencës së M.R.Publik me median dhe me publikun, por të kundërtës.

           8. Ndërhyrja jonë për të bërë të mundur dhe lehtësuar pajisjen me pasaporta të të gjithë shtetasve shqiptarë që janë me banim jashtë shtetit. Si rezultat i kësaj, doli Udhëzimi i përbashkët i Ministrit të Punëve të Jashtëme Nr.7677, dt. 03.12.2002, Ministrit të Rendit Publik Nr. 4478, dt. 02.12.2002 dhe Ministrit të Financave Nr. 8249, dt. 09.12.2002 “Për proçedurat e pajisjes me pasaporte të shtetasve shqiptarë me banim jashtë shtetit”. Ky udhëzim iu jep mundësine të gjithë shtetasve shqiptarë që janë me banim jashtë shtetit për të aplikuar në përfaqësitë diplomatike ose konsullore të Republikës së Shqipërisë në shtetin ku ata janë rezident ose në përfaqësitë që mbulojne shërbimet konsullore për vendin ku ata janë vendosur me banim. Në bazë të këtij udhëzimi, ata mund të aplikojnë edhe në Komisariatet e Policisë në vendin tonë, në juridiksionin e të cilëve ndodhet zyra e gjëndjes civile ku ata gjënden të rregjistruar. Duhet theksuar se atyre iu dha mundësia që të aplikojnë për pajisjen me pasaporta edhe nëpërmjet përfaqësuesve të tyre të pajisur me prokurë të posaçme.

Ndikimi ynë pozitiv për respektimin e të drejtave të shtetasve nga punonjësit e Policisë, si dhe për respektimin e të drejtave ligjore të vetë punonjësve të Policisë nga eprorët e tyre, përveçse me rekomandime, është përcjellë edhe në mënyra të tjera. Kështu mund të përmëndim; fjalimet e mbajtura nga Avokati i Popullit në analiza pune, takime e seminare të ndryshme organizuar nga M.R.Publik, Drejtoria e Përgjithshme e Policisë së Shtetit ose nga OJF-të; ngritja e problemeve të ndryshme nga ana jonë në organet e medias së shkruar e vizive; botime të artikujve apo temave të ndryshme në organet e medias për respektimin e të drejtave dhe lirive themelore të shtetasve, etj. Të gjitha këto veprime janë mirëpritur nga qytetarët dhe vetë punonjësit e Policisë.

V.               Rekomandime për çështje të pazgjidhura.

Nuk duhet të lemë pa përmendur, se në raportet vjetore kemi bërë rekomandime të vazhdueshme për parandalimin e torturës dhe formave të tjera të keqtrajtimit dhe shkeljeve të ligjit nga policia. Kështu mund të përmëndim sidomos këto çështje që kanë të bëjnë me personat që shoqërohen dhe pyeten në zyrat e Policisë. Nga mos zbatimi i rregullave ekzistuese apo mos nxjerja e këtyre rregullave të reja, kanë ndodhur shpesh ngjarje të rënda, deri edhe vdekje në zyrat e Policisë, si në Tiranë, Mirditë etj dhe ka mjaft ankesa për rrahje apo keqtrajtime në këto zyra.

- të drejtën e individit të privuar nga liria, për njoftimin e një të afërmi ose të një të treti ose avokatit sipas dëshirës;

- të drejtën e vizitës, efektivisht të zbatueshme, nga një mjek për personat e privuar nga liria, qysh në fillim të privimit të tyre nga liria;

- çdo person të privuar nga liria prej policisë, t’i dorëzohet sistematikisht një formular ku saktësohen të drejtat e tij;

- përpunimin e një udhëzimi të saktë (kod i sjelljes) për marrjen në pyetje nga policia të personave të ndaluar, arrestuar dhe për personat e mbajtur nga policia për qëllime administrative;

- përmirësimin e kushteve të mbajtjes së shtetasve në qelitë e paraburgimit dhe në ambjentet e policisë;

- akordimin e një buxheti të posaçëm organeve të policisë për të financuar ushqimin e të ndaluarve pa burime financiare, apo të huajëve që kapen duke kaluar kufirin shtetëror;

- realizimin e plotë të kalimit të vartësisë së personelit të dhomave të izolimit nga Ministria e Rendit Publik në atë të Ministrisë së Drejtësisë;

- formimin profesional fillestar dhe në vazhdim të punonjësve të policisë të të gjitha gradave dhe kategorive, si dhe përzgjedhjen dhe rekrutimin e punonjësve të rinj të policisë.

- vendosjen e një numëri telefonik falas për komunikimin me Avokatin e Popullit të personave të izoluar nga Policia etj.

Mirëpo, megjithëse këto rekomandime i kemi përsëritur, ato nuk kanë gjetur zbatim plotësisht. Besojmë se këto rekomandime do vlerësohen dhe zbatohen në një të ardhme të afërt.

VI.     Reagimi ynë për rastet e ushtrimit të dhunës ndaj shtetasve shqiptarë nga Policitë  e vendeve fqinjë.

Punë e mirë dhe e konsiderueshme nga ana jonë është bërë edhe për rastet e keqtrajtimeve të shtetasve shqiptarë nga policitë e shteteve fqinjë Greqisë, Maqedonisë dhe Malit të Zi. Meqënëse këto lloj ankesa nuk i kemi në juridiksion, në këto raste shumicën e ankesave të bëra nga shtetasit apo edhe atyre të filluara me iniciativë ua kemi dërguar për kompetencë Ombudsmanit të Greqisë dhe atij të Maqedonisë.

Por i rëndësishëm ka qenë konstatimi në vitin 2001, se organet e policisë kufitare shqiptare nuk i evidentonin në kallëzime penale të shkruara rastet e keqtrajtimeve të shtetasve shqiptarë, kur ata hynin në tokën shqiptare. Si rrjedhojë e rekomandimit tonë, me urdhërin e përbashkët Nr. 2037, datë 23.07.2001, Ministri i Rendit Publik dhe Prokurori i Përgjithshëm udhëzuan organet e tyre vartëse për evidentimin dhe hetimin e këtyre rasteve të keqtrajtimit.

           Duke marrë shkas nga ankesat e shtetasve shqiptarë për keqtrajtime nga Policitë e vendeve të tjera ballkanike, jemi përpjekur për krijimin e një rrjeti bashkëpunimi midis zyrave të Ombudsmanëve të rajonit të Ballkanit. Me anë të këtij rrjeti shkëmbejmë jo vetëm informacione dhe përvojë nga veprimtaria e secilit, por kur ka raste të shkeljeve të të drejtave të shtetasve tanë në vendet e tjera, ja dërgojmë ankesat apo njoftimet Ombudsmanëve të vëndeve përkatëse për t’i verifikuar dhe zgjidhur sipas ligjeve të secilit vend. Kuptohet se nga realizimi i kësaj ideje përfitojnë të gjithë qytetarët ballkanikë, por më tepër se të gjithë përfitojnë shtetasit shqiptarë. Këtë ide e kanë mirëpritur Ombudsmanët e Greqisë, të Kosovës, të Maqedonisë dhe së fundi edhe 15 Difensore Civico të 15 provincave në Itali.

Në veçanti i kemi sugjeruar homologut grek që t’i drejtojë rekomandime Policisë dhe Ushtrisë Greke, në mënyrë që ata të trajnohen në lidhje me respektimin e të drejtave të njeriut. Në të njëjtën kohë i kemi sugjeruar bërjen e një rekomandimi drejtuar autoriteteve greke të drejtësisë, në mënyrë që të jenë objektive në rastet e hetimit dhe proçeseve gjyqësore ndaj policëve grekë që keqtrajtojnë dhe vrasin shqiptarët. Në komunikimin me ta i kemi theksuar se e konsiderojmë jetën dhe dinjitetin e shqiptarëve të njëjtë me jetën dhe dinjitetin e çdo qytetari grek ose europian. Këto mesazhe i kemi përcjellë të gjithe homologëve sidomos ballkanikë dhe autoriteteve të larta shteterore në takimet zyrtare që kemi patur brenda dhe jashtë Shqipërisë.

Për mbrojtjen e të drejtave të shtetasve shqiptarë nga veprimet e kundërligjëshme të policive të vendeve fqinjë, në mënyrë të vazhdueshme i kemi dërguar informacione autoriteteve më të larta europiane e ndërkombëtare të mbrojtjes së të drejtave të njeriut siç mund të përmëndim: Komisionerit të të Drejtave të Njeriut pranë Këshillit të Europës, zotit Alvaro Gil-Robles; Përfaqësuesit të Komitetit Kundër Torturës pranë Këshillit të Europës, zotit Fabrice Kellens; Përfaqësueses së Amnesty International, zonjës Melanie Anderson, etj. Për veç informimit të bërë, atyre i kemi kërkuar ndërkohë që të ushtrojnë autoritetin e tyre ndaj qeverive të vendeve që shkelin të drejtat e njeriut dhe konkretisht të shtetasve shqiptarë, me qëllim që raste të tilla të mos përsëriten në të ardhmen.

           Siç konstatohet, kohët e fundit rastet e keqtrajtimeve të shtetasve shqiptarë nga policitë e vendeve fqinje kanë qënë më të rralla.

           Bashkëlidhur po ju dërgojmë edhe listën e punonjësve të policisë të ndëshkuar në bazë të rekomandimeve tona dhe të atyre për të cilët kemi kërkuar ndjekje penale.

           Duke besuar në mirëkuptimin Tuaj,

 Me respekt

AVOKATI  I  POPULLIT

        Ermir  DOBJANI

 ---------------------------------------------------------------------------------------

Lista emërore, detyra dhe vendi i punës i punonjësve të policisë të ndëshkuar në bazë të rekomandimeve tona, si dhe masat disiplinore të dhëna.

1.          Bashkim Bushi, referent në Komisariatin e Policisë Fier, u shkarkua dhe u ul në detyrë.

2.          Rrapo Xhavara, inspektor i policisë kriminale në Komisariatin e Policisë Sarandë, u përjashtua nga Policia dhe u dërgua për ndjekje penale.

3.          Zarif Male, polic në Komisariatin e Policisë Nr. 4 Tiranë, iu dha vërejtje.

4.          Kujtim Rama, oficer policie në Komisariatin e Policisë Elbasan, u lëviz dhe u ul në detyrë.

5.          Leonard Doçi, inspekor i Policisë kriminale, në Komisariatin e Policisë Kuçovë, iu dha vërejtje me paralajmërim.

6.          Enver Ajazi, polic në Komisariatin e Policisë Kuçovë, iu dha vërejtje me paralajmërim.

7.          Ilir Ademi, polic në Komisariatin e Policisë Kuçovë, iu dha vërejtje me paralajmërim.

8.          Fredi Kodra, inspektor i Policisë rendit në Komisariatin e Policisë Pogradec, iu dha vërejtje.

9.          Kastriot Elmazllari, inspektor i Policisë rendit në Komisariatin e Policisë Pogradec, iu dha vërejtje.

10.     Adrian Foto, polic në Komisariatin e Policisë Kuçovë, u përjashtua nga Policia.

11.     Ardian Çipa, inspektor i Policisë kriminale, në Komisariatin e Policisë Nr. 3 Tirane, iu dha vërejtje me paralajmërim.

12.     Muhamet Dyrmishi, Shefi  i Komisariatit të Policisë Nr. 4 Tiranë, u ul në detyrë.

13.     Eduart Çelmeta, Shefi i Rendit në Komisariatit të Policisë Nr. 4 Tiranë, u ul në detyrë.

14.     Klodian Tili, Shefi i Rendit në Komisariatin e Policisë Pogradec, u shkarkua dhe u ul në detyrë.

15.     Viktor Hysa, drejtor i Buxhet-Financës në M.R.Publik, iu dha vërejtje.

16.     Martin Coli, polic në Komisariatin e Policisë Rrugore Tiranë, iu dha vërejtje.

17.     Flamur Gjuzi, shefi i zyrës së antitrafiqeve në Drejtorinë e  Policisë Durres, iu dha vërejtje me paralajmërim.

18.     Gëzim Duda, polic në Komisariatin e Policisë Kavajë, u përjashtua nga Policia.

19.     Martin Dona, inspektor i Policisë kriminale në Komisariatin e Policisë Lezhe, iu dha vërejtje me paralajmërim.

20.     Një polici të Forcave Speciale, iu dha vërejtje me paralajmërim.

21.     Ervin Hodo, inspektor i policisë kriminale në Komisariatin e Policisë Nr. 1 Tiranë, u pezullua nga detyra.

22.     Fatmir Lleshi, shefi i policisë rrugore në Komisariatin e Policisë Shkodër, iu dha vërejtje.

23.     Valentin Florini, shefi i rendit në Komisariatin e Policisë   Shkodër, iu dha vërejtje.

24.     Artur Selimi, Komandant i Repartit të FNSH Vlorë, iu dha vërejtje.

25.     Astrit Koja, ispektori i policisë rendit në Komisariatin e Policisë Librazhd, u pezullua nga detyra.

26.     Vladimir Zani, oficer i policisë së rendit në Komisariatin e Policisë Vlorë, iu dha vërejtje.

27.     Muço Aliaj, inspektor i policisë së rendit në Komisariatin e Policisë Vlorë, iu dha vërejtje.

28.     Ergys Lala, inspektor i policisë kriminale në Komisariatin e Policisë Nr. 1 Tiranë, iu dha vërejtje me paralajmërim.

29.     Dalan Canaj, inspektor i policisë kriminale në Komisariatin e Policisë Durrës, iu dha vërejtje me paralajmërim.

30.     Njazi Xite, inspektor i policisë së rendit në Komisariatin e Policisë Korçë, u përjashtua nga Policia.

31.     Rajmond Duro, punonjës policisë kriminale në Komisariatin e Policisë Korçë, u përjashtua nga Policia.

32.     Isuf Balla, polic në Komisariatin e Policisë Durrës, iu dha vërejtje.

33.     Arben Dashi, Drejtor i Policisë së Qarkut  Korçë, u shkarkua dhe u ul në detyrë.

34.     Fatmir Shehu, Shefi Komisariatit të Policisë Korçë, u shkarkua dhe u ul në detyrë.

35.     Gramoz Dafku, inspektor i policisë kriminale në Komisariation e Policisë Kavajë, iu dha vërejtje me paralajmërim.

36.     Ilir Barjami, inspektor i policisë kriminale në Komisariatin e Policisë Fier, iu dha vërejtje me paralajmërim.

37.     Ervin Hodaj, shefi i policisë kriminale në Komisariatin e Policisë Fier, iu dha masa disiplinore vërejtje.

38.     Arjan Dhespollari, kontrollor në VKK Kapshticë Devoll, u pezullua nga detyra.

39.     Dhimitër Çuko, polic në VKK Kapshticë Devoll, u përjashtua nga Policia.

40.     Arjan Hajrullai, polic në VKK Kapshticë Devoll, u pezullua nga detyra.

41.     Roland Xhelili, kontrollor në VKK Kapshticë Devoll, iu dha vërejtje.

42.     Bejkush Sina, Shefi i Komisariatit të Policisë Kukës, iu dha vërejtje.

43.     Xhevat Todaj, Shefi i Rendit në Komisariatit e Policisë Kukës, iu dha vërejtje.

44.     Gëzim Cara, inspektor i policisë së rendit në Komisariatin e Policisë Kukës, u shkarkua dhe ul në detyrë.

45.     Andi Marku, inspektor i policisë kriminale në Komisariatin e Policisë Peshkopi, u pezullua nga detyra.

46.     Nuri Smaçi, inspektor i rendit në Komisariatrin e Policisë Peshkopi, u pezullua nga detyra.

47.     Robert Ibrahimi, komandant i postës së Policisë në Leskovik, iu dha vërejtje me paralajmërim.

48.     Entiol Xhelilaj, inspektor i policisë kriminale në Komisariatin e Policisë Nr. 3 Tirane, iu dha  vërejtje.

49.     Valter Bizhga, polic në Komisariatin e Policisë Tepelenë, iu dha vërejtje.

50.     Rrapi Vogli, zëdhënës në Drejtorine e Policisë së Qarkut Fier, u shkarkua dhe u ul në detyrë.

51.     Mariglen Duçi, inspektor i policisë kriminale në Komisariatin e Policisë Shkodër, iu dha  vërejtje.

52.     Haxhi Hoxha, polic në Komisariatin e Policisë Peshkopi, iu dha vërejtje.

53.     Elez Plaku, polic në Komisariatin e Policisë Peshkopi, iu dha vërejtje.

54.     Eduart Kaba, polic në Komisariatin e Policisë Peshkopi, iu dha vërejtje.

Lista emërore, detyra dhe vendi i punës i punonjësve të Policisë për të cilët kemi kërkuar ndjekje penale.

1.          Seit Bici, polic në Komisariatin e Policisë Nr. 1 Tiranë, për     veprën penale të kryerjes së veprimeve arbitrare, filloi dhe u pezullua.

2.          Rrapo Xhavara, inspektor i Policisë kriminale në Komisariatin e  Policisë Sarandë, për veprën penale të kryerjes së veprimeve    arbitrare, u pushua dhe u rifillua me kërkesën tonë drejtuar Prokurorit të Përgjithshëm.

3.          Agron Nano, inspektor i policisë kriminale në Komisariatin e Policisë Nr. 4 Tiranë, për veprën penale të vjedhjes për shkak të detyrës, filloi dhe u pushua.

4.          Dalip Hoxha, inspektor i Policisë kriminale në Komisariatin e Policisë Nr. 4 Tiranë, për veprën penale të vjedhjes për shkak të detyrës, filloi dhe u pushua.

5.          Ervin Hodo, inspektor i policisë kriminale në Komisariatin e Policisë Nr. 1 Tiranë, për veprën penale te kryerjes së veprimeve arbitrare, filloi dhe u pushua sepse hoqën dorë të dëmtuarit.

6.          Fatmir Lleshi, shefi i Policisë rrugore në Komisariatin e Policisë Shkodër, për veprën penale të kryerjes së veprimeve arbitrare, filloi dhe u pushua sepse nuk u paraqitën të dëmtuarit në prokurori për të dhënë deklarime.

7.          Valentin Florini, shefi i rendit në Komisariatin e Policisë Shkodër, për veprën penale të kryerjes së veprimeve arbitrare, filloi dhe u pushua sepse nuk u paraqitën të dëmtuarit në prokurori për të dhënë deklarime.

8.          Artur Selimi, komandant i FNSH Vlorë, për veprën penale të kryerjes së veprimeve arbitrare, filloi dhe u pushua sepse nuk u paraqit e dëmtuara për të dhënë deklarime.

9.          Astrit Koja, inspektor i policisë së rendit në Librazhd, për veprën penale të kryerjes së veprimeve arbitrare, filloi, u dërgua për gjykim dhe ka  marë pafajësi.

10.     Besim Hasani, oficer i Gardës së Republikës, për veprën penale të kryerjes së veprimeve arbitrare, filloi dhe u pushua në gjykatë, sepse hoqi dorë i dëmtuari.

11.     Njazi Xite, inspektor i policisë së rendit në Komisariatin e Policisë Korçë, për veprën penale të marrjes së mitës, u dënua nga gjykata me 3 vjet burg me vendimin Nr. 95, dt. 09.09.2003, të Gjykatës së Apelit Korçë i cili u la në fuqi nga Gjykata e Lartë.

12.     Ilia Gogo, inspektor i Policisë kriminale Komisariatin e Policisë Berat, për veprën penale të kryerjes së veprimeve arbitrare, filloi dhe u pushua nga prokuroria.

13.     Fatmir Varfi,  inspektor i Policisë kriminale në Komisariatin e Policisë Berat, për veprën penale të kryerjes së veprimeve arbitrare, u deklarua fajtor dhe u dënua me 20.000 lekë gjobë me vendimin Nr. 28, dt. 18.04.2003, të Gjykatës Ushtarake Vlorë.

14.     Hamdi Nezha, polic në Komisariatin e Policisë Berat, për veprën penale të kryerjes së veprimeve arbitrare, filloi dhe u pushua nga prokuroria.

15.     Vasillaq Bano, polic në Komisariatin e Policisë Berat, për veprën penale të kryerjes së veprimeve arbitrare, filloi dhe u pushua nga prokuroria.

16.     Ervin Elezi, oficer i policisë kriminale në  Komisariatin Nr. 2 Tiranë, për veprën penale të kryerjes së veprimeve arbitrare, filloi dhe u pushua sepse hoqi dorë i dëmtuari.

17.     Martin Dona, shef i Policisë kriminale në Komisariatin e  Policisë Lezhe, për veprën penale të kryerjes së veprimeve arbitrare.

18.     Hil Zefi, punonjes policie në Komisariatin e Policisë Lezhë, për veprën penale të kryerjes së veprimeve arbitrare.

19.     Tonin Marashi, punonjes policie në Komisariatin e Policisë  Lezhe, për  veprën penale të kryerjes së veprimeve arbitrare.

20.     Edmond Lleshi, punonjes policie në Komisariatin e Policisë Lezhë.

21.     Gjon Kola, punonjës policie në Komisariatin e Policisë Lezhë.

22.     Lorenc Balliu, me detyrë oficer i policisë gjyqësore në  Komisaritin e Policisë Korçë, u dënua me 16 vjet burg për kryerjen e veprës penale të vrasjes, parashikuar nga neni 76 i K.Penal, me vendimin Nr. 82, dt. 17.03.2003, të Gjykatës së Shkallës së Parë Korçë. Vendimi është lënë në fuqi nga Gjykata e Apelit dhe e Lartë.

23.     Dashnor Ganolli, me detyrë inspektor i policisë së zonës, në       Komisaritin e Policisë Korçë,  u dënua me  3 vjet burg për kryerjen e  veprës penale të veprimeve arbitrare, parashikuar nga neni 250 i K.Penal, me vendimin Nr. 82, dt. 17.03.2003, të Gjykatës së Shkallës së Parë Korçë. Vendimi është lënë në fuqi nga Gjykata e Apelit dhe e Lartë.

24.     Albert Myftari, me detyrë polic i grupit të gatshëm në Komisaritin e Policisë Korçë, u dënua me 5 muaj burg për kryerjen e veprës penale të moskallzimit të krimit, parashikuar nga neni 300 i K. Penal, me vendimin Nr. 82, dt. 17.03.2003, të Gjykatës së Shkallës së Parë Korçë. Vendimi është lënë në fuqi nga Gjykata e Apelit dhe e Lartë.

25.     Sokol Gurishta, me detyrë polic i grupit të gatshëm në Komisaritin e Policisë Korçë,  u dënua me 4 muaj burg  për kryerjen e veprës penale të moskallzimit të krimit, parashikuar nga neni 300 i K.Penal, me vendimin Nr. 82, dt. 17.03.2003, të Gjykatës së Shkallës së Parë Korçë. Vendimi është lënë në fuqi nga Gjykata e Apelit dhe e Lartë.

26.     Robert Qyli, me detyrë polic i grupit të gatshëm në Komisaritin e Policisë Korçë, u dënua me 4 muaj burg për kryerjen e veprës penale të moskallzimit të krimit, parashikuar nga neni 300 i K.Penal,  me vendimin Nr. 82, dt. 17.03.2003, të Gjykatës së Shkallës së Parë Korçë. Vendimi është lënë në fuqi nga Gjykata e Apelit dhe e Lartë.

27.     Ramazan Ymeraj, me detyrë polic i grupit të gatshëm në Komisaritin e Policisë Korçë,  u dënua me 4 muaj burg  për kryerjen e veprës penale të moskallzimit të krimit, parashikuar nga neni 300 i K.Penal,  me vendimin Nr. 82, dt. 17.03.2003, të Gjykatës së Shkallës së Parë Korçë. Vendimi është lënë në fuqi  nga Gjykata e Apelit dhe e Lartë.

28.     Ervin Hasrama, me detyrë komandat i repartit të policisë në       Komisariatin Nr. 2 Tiranë, për veprën penale të kryerjes së veprimeve arbitrare, filloi dhe u pushua në gjykatë sepse hoqi dorë i  dëmtuari.

29.     Alket Dizdari, me detyrë inspektori i policisë kriminale në       Komisariatin e Policisë Nr. 4 Tiranë, për veprën penale të kryerjes së veprimeve arbitrare, filloi dhe u pushua nga Prokuroria sepse hoqi dorë i dëmtuari.

30.     Ali Çerenishti, polic në Komisariatin e Policisë Nr. 4 Tirane, për veprën penale të kryerjes së veprimeve arbitrare, u pushua nga Prokuroria sepse hoqi dorë i dëmtuari.

31.     Irena Babameto, inspektore e policisë kriminale në Drejtorinë e Policisë së Qarkut Tiranë, për shpërdorim detyre. Rekomandimi nuk u pranua.

32.     Rekomandimi drejtuar Prokurorisë së rrethit Shkodër për fillimin e ndjekjes penale ndaj 5 policëve për veprën penale  të kryerjes së veprimeve arbitrare. U fillua dhe u pezullua për moszbulim të autorëve. 

33.     Rekomandimi drejtuar Prokurorisë së rrethit Elbasan për fillimi i hetimeve për një grup policësh të FNSH Elbasan për veprën penale të vjedhjes për shkak të detyrës, (vjedhur sende gjatë ushtrimit të kontrollit të banesës së një shtetasi), u fillua dhe u pezullua. 

34.     Rekomandimi drejtuar Prokurorisë së rrethit Tiranë për fillimin i ndjekjes penale ndaj disa punonjësve të Policisë të Komisariatit të Policisë Nr. 2 Tiranë, për keqtrajtimin e shtetasit Beqir Kllogjerit, u fillua dhe u pezullua për mos zbulim të autorëvë. U kërkua rifillimi i hetimit Prokurorit të Përgjithshëm. Çështja rezulton e pushuar.

35.     Rekomandimi drejtuar Prokurorisë së rrethit Tiranë për fillimin e ndjekjes penale ndaj 17 punonjësve të policisë të RENEAS, për keqtrajtimin e të arrestuarëve të grupit të “Gaxhait”,  u fillua dhe u pushua.

36.      Rekomandimi drejtuar Prokurorisë së rrethit Tiranë për fillimin e ndjekjes penale ndaj punonjësve të Gardës së Republikës, për keqtrajtimin e shtetases Zyra Kola. Rekomandimi nuk u pranua.