I nderuar Zoti Kryeministër,

          Nëpërmjet mediave jemi informuar për takimin që Ju keni bërë me delegacionin e Këshillit të Europës, të kryesuar nga Kryetari i Komitetit kundër Torturës. Gjatë takimit delegacioni Ju ka dorëzuar raportin e Komitetit kundër Torturës për Shqipërinë. Këtë raport dhe rekomandimet e bërë në të, Ju ja keni bërë të njohur anëtarëve të Qeverisë në mbledhjen e datës 05.04.2006.

          Ne vlerësojmë maksimalisht qëndrimin Tuaj lidhur me raportin dhe veçanërisht angazhimin ndaj rekomandimeve të tij. Eshtë e vërtetë që të paktën qysh nga viti 2000 që ekziston institucioni i Avokatit të Popullit, Komiteti kundër Torturës i ka ngritur këto probleme, të cilat gjithashtu janë mbështetur nga ne në të gjitha Raportet vjetore që kemi paraqitur në Kuvendin e Shqipërisë, duke ju kërkuar autoriteteve shqiptare dhe veçanërisht atyre të policisë e të burgjeve zbatimin e rekomandimeve. Ne kemi vendosur për të burgosurit telefonin pa pagesë me nr.800 1111 dhe kjo linjë funksionon. Por për ankesa nga vendet e paraburgimit apo komisariatet e policisë kjo linjë nuk funksionon për arsye të mos mbulimit të shpenzimeve financiare.

          Në vijim të angazhimit Tuaj, në zbatim të rekomandimeve të Komitetit Kundër Torturës për përmirësimin e kushteve në burgje dhe respektimin e të drejtave të të dënuarve e të paraburgosurve, Ju kërkojmë që linja telefonike e komunikimit të drejtpërdrejtë nga komisariatet e policisë për të paraburgosurit të vendoset edhe me Institucionin e Avokatit të Popullit. Ne gjykojme se vendosja e kësaj linje do të ndikonte shumë në parandalimin e shkeljeve dhe në të njëjtën kohë do të rriste më shumë edhe angazhimin e Institucionit tonë në mbrojtjen e të drejtave të tyre.

          Gjithashtu Ju vemë në dijeni se me shkresën tonë Nr. 119/1 Prot., dt. 16.12.2005, i kemi dërguar Ministrit të Drejtësisë z. Bumçi, projektligjin për ndryshimin dhe përmirësimin e nenit 86 të Kodit tonë Penal për veprën penale të torturës dhe i kemi rekomanduar atij që nëpërmjet Qeverisë të propozojë ndryshimin përkatës në Kuvendin e Shqipërisë.

Ministri i Drejtësisë me shkresën Nr. 8855/1 Prot., dt. 06.01.2006, na informoi se e mirëpriti rekomandimin tonë dhe do ta konsiderojë maksimalisht atë në kuadrin e ndryshimeve që do t’i bëhen Kodit Penal. Me këtë rast do të sugjeronim që ky ndryshim të bëhet sa më shpejt, mbase pa pritur ndryshime të tjera të Kodit Penal.

Duke besuar në mirëkuptimin Tuaj,

                                                           Me respekt

AVOKATI  I  POPULLIT

        Ermir  DOBJANI