Gjykata Kushtetuese e Republikës së Shqipërisë, e përbërë nga:

            Fehmi Abdiu,             Kryetar i Gjykatës Kushtetuese

            Sabri Rrapi,               Anëtar i                        “            “

            Zija Vuci,                  Anëtar i                        “            “

            Alfred Karamuço,      Anëtar i                        “            “

            Kristofor Peçi,           Anëtar i                        “            “          

            Kujtim Puto,              Anëtar i                        “            “

            Sokol Sadushi            Anëtar i                        “            “

            Hajredin Fuga            Anëtar i                        “            “

                     

 

            me sekretare Arbenka Lalica, në datë 17.7.2000, mori në shqyrtim në seancë gjyqësore me dyer të hapura çështjen me nr. te Aktit që i përket:

 

  

KËRKUES : AVOKATI I POPULLIT, përfaqësuar ng z . Ermir Dobjani.

SUBJEKTE TË INTERESUARA :

1.KUVENDI I SHQIPËRISË,    në mungesë

2.KËSHILLI  I  MINISTRAVE, në mungesë

 

O B J E K T I

 

Interpretimi i pikës 2 të nenit 134 të Kushtetutës së Republikës  së Shqipërisë. Kërkuesi ka parashtruar këto shkaqe në kërkesën e tij .

Ndër subjektet që kanë të drejtë të vënë në lëvizje Gjykatën Kushtetuese përshihet edhe Avokati i Popullit , por sipas nenit 134 pika 2 të Kushtetutës, kërkesën mund ta bëjë “vetëm, për çështje që lidhen me interesat e tij”. Përcaktimi nëpërmjet interpretimit, të rrethit të çështjeve që përbëjnë interesa të “Avokatit të Popullit, në këtë  moment paraqet rëndësi për funksionimin e institucionit të Avokatit të Popullit. Këto interesa mund të ishin:

Çështjet, që lidhen me mbrojtjen e të drejtave, lirive dhe interesave të ligjshme  të individëve apo grup individësh , siç përcaktohet  në nenin 60, pika  1 e Kushtetutës dhe Ligji nr.8454, datë 04.02.1999 “Për Avokatin e  Popullit”.

Çështjet që lidhen me pavarësinë  e tij në ushtrimin e funksionit, që përcaktohen në nenin 60, pika 2 e 63 të Kushtetutës dhe ligjit organik “Për Avokatin e  Popullit”.

Çështjet, që kanë të bëjnë me buxhetin, strukturën, organikën, pagat, etj.

Çështjet që kanë të bëjnë me mënyrën e zgjedhjes, imunitetin e pagës, kohëzgjatja në detyrë dhe papjatueshmërinë në këtë funksion, që parashikohen nga nenet 61 e 62 të Kushtetutës dhe nga ligji organik.

 

GJYKATA KUSHTETUESE

 

Pasi dëgjoi kërkuesin si dhe diskutoi çështjen në tërësi,

 

 

V Ë R E N

 

Sipas nenit 134 të Kushtetutës, subjektet që mund të venë në lëvizje Gjykatën Kushtetuese ndahen në dy grupe; në subjekte që mund të ushtrojnë kërkesë në mënyrë të pakushtëzuar dhe në subjekte, që  mund të ushtrojnë kërkesë të kushtëzuar “vetëm për çështje që lidhen  me interesat e tyre”. Ky dallim, del nga përmbajtja e pikës 2, të nenit 134 të Kushtetutës dhe në këtë kategori subjektesh që mund t’i drejtohen Gjykatës Kushtetuese, në mënyrë të kushtëzuar, përfshihet  edhe Avokati i Popullit. Më konkretisht, në pikën 2 të nenit 134 thuhet: ” subjektet e parashikuara në paragrafet dh............ të paragrafit 1 të këtij neni, mund të bëjnë kërkesë  vetëm për çështje që lidhen për interesat e tyre”.

Sipas nenit 131 të Kushtetutës dhe të neneve të tjera të saj, në juridiksionin e  Gjykatës Kushtetuese përfshihen mjaft çështje për të cilat kjo vendos, por nga fryma e Kushtetutës që gjen zbërthim në ligjin nr. 8577,datë 10.02.2000 “ Për organizimin dhe funkionimin e Gjykatës Kushtetuese të Republikës së Shqipërisë “Avokati i Popullit ka të drejtë të parashtrojë kërkesë në Gjykatën Kushtetuese për pajtueshmërinë e ligjit ose të akteve të tjera normative me Kushtetutën ose me marrëveshjet ndërkombëtare (neni 49), për pajtueshmërinë e marrëveshjeve ndërkombëtare me kushtetutën (neni 52) dhe për interpretimin e Kushtetutës (neni 71), gjithnjë kur çështja lidhet me interesat e tij.

Në bazë të paragrafit të parë, të nenit 60 të Kushtetutës të Republikës së Shqipërisë, Avokati i Popullit ka për funksion të tij “të mbrojë të drejtat, liritë dhe interesat e ligjshme të individit nga veprimet ose mosveprimet e paligjshme e të parregullta të organeve të administratës publike”. Në këtë kuptim, me çështje që lidhen me interesat  e Avokatit të Popullit do të jenë pikërisht ato çështje, që lidhen me këtë funksion kushtetues të ngarkuar Avokatit të Popullit, kur si rrjedhojë e zbatimit të  ligjit, e aktit normativ nënligjor, nga veprimet ose mosveprimet e organeve të administratës publike, këto interesa  janë cënuar duke shkelur të drejtat, liritë dhe  interesat  e ligjshme të individëve, shkelje këto, të konstatuara në procesin e veprimtarisë së Avokatit të Popullit, gjatë shqyrtimit të ankesave, kërkesave dhe njoftimeve që i paraqiten atij.

Kushtetuta, në nenin 60, paragrafi 2 e 3 , në nenin 61 dhe 62 të saj, vendos rregulla të organizimit dhe të funksionimit të institucionit të Avokatit të Popullit . Në kuptim të nenit 134, paragrafi 2 të Kushtetutës, me interesa të Avokatit të Popullit do të konsiderohen edhe rastet e cënimit të këtyre rregullave kushtetuese, që kanë të bëjnë me organizimin dhe funksionimin e institucionit të Avokatit të Popullit, pavarësisht, nëse janë vërtetuar ose jo pasojat.

 

PËR KËTO ARSYE,

 

Gykata Kushtetuese e Republikës së Shqipërisë, duke u bazuar në nenin 134, paragrafi 2 të Kushtetutës së Republikës së Shqipërisë dhe në nenet 71, 72 dhe 79 të Ligjit nr. 8577,datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, njëzëri

 

V E N D O S I

 

1.Avokati i Popullit, në kuptim të nenit 134, paragrafi 2 të Kushtetutës mund t’i drejtohet me kërkesë Gjykatës Kushtetuese për rastet e parashikuara në nenet 49, 52 dhe 71 të ligjit 8577, datë 10.02.2000 “Për organizimin dhe funksionimin e Gjykatës Kushtetuese së Republikës së Shqipërisë”, për çështje që lidhen me funksionin e tij në mbrojtje të drejtave, lirive dhe interesave të ligjshme të individit, kur këto janë shkelur nga veprimet ose mosveprimet e paligjshme e të parregullta të organeve të administratës publike e të konstatuara nga Avokati i Popullit, si dhe kur janë cënuar rregullat kushtetuese pë organizimin dhe funskionimin e institucionit të tij.

2. Ky vendim është  përfundimtar, i formës së prerë dhe ka fuqi nga miratimi i Kushtetutës.

 

U shpall sot me datë 31.07.2000

Nr.51 i Rregj. Themeltar

Nr. 49 i Vendimit