Nr. 149 Prot.                                                   Tiranë, më  23/06/2009

KERKESE:

Kërkues:                                  Institucioni i Avokatit te Popullit,

Perfaqesuar nga Avokati i Popullit, 

z. Ermir Dobjani

                        TIRANE

Subjekt i interesuar:                Kuvendi i Shqiperise

Keshilli i Ministrave i Republikes se

Shqiperise.

Nazmi Driza

Fshati Fushe Kastriot, Komuna Kastriot,

Diber

Shoqeria “Dudaj Konstruksion”;

Rr. “Brigada VIII”, pall.Teknoprojekt, kat.I, perfaqesuar nga administratori i saj, z.Besnik Dudaj.

Objekti:                                         1) Shfuqizimi si, antikushtetues te Ligjit nr.9948, dt.07.07.2008, “Per shqyrtimin e vlefshmerise ligjore te krijimit te titujve te pronesise mbi token bujqesore.”, si dhe te Vendimit te Keshillit te Ministrave nr.1269, dt.17.09.2008 “Per perberjen, menyren e funksionimit dhe detyrat e pergjegjesite e strkturave shteterore te ngarkuara per shqyrtimin e vlefshmerise ligjore te te krijimit te titujve te pronesise mbi token bujqesore”.

2) Pezullimin e Ligjit nr. 9948, dt. 07.07.2008, “Per shqyrtimin e vlefshmerise ligjore te krijimit e titujve te pronesise mbi token bujqesore.” dhe te Vendimit te Keshillit te Ministrave nr.1269, dt.17.09.2008 “Per perberjen, menyren e funksionimit dhe detyrat e pergjegjesite e strkturave shteterore te ngarkuara per shqyrtimin e vlefshmerise ligjore te te krijimit te titujve te pronesise mbi token bujqesore”

Baza ligjore:                            Nenet 4, 7, 15, 17, 18, 41, 42 te Kushtetutes se Republikes se Shqiperise; nenet 27-30, 39, 45 dhe 49/2 te Ligjit nr.8577, dt.10.02.2000 “Per organizimin dhe funksionimin e Gjykates Kushtetuese te Republikes se Shqiperise” dhe neni 24/“c”, i Ligjit nr.8454, dt. 04.02.1999 “Per Avokatin e Popullit”, i ndryshuar.

Perpara :                                 Gjykates Kushtetuese  

 TIRANE

Paraqitja e faktit :

Prane institucionit tone, kohet e fundit, kane ardhur ankesa nga persona fizike dhe juridike, ne te cilat shprehet shqetsimi, lidhur me Ligjin nr.9948, dt.07.07.2008 “Per shqyrtimin e vlefshmerise ligjore te krijimit te titujve te pronesise mbi token bujqesore”. Permendim ketu rastin e shtetasit Nazmi Drizi, banues ne Fshat Kastriot, Komuna Kastriot, Diber, qe ka pretendime ndaj menyres se funksionimit te Komisionit Vendor prane Prefektures.

Po ashtu, te njejtin objekt ankimi ka, edhe administratori i Shoqerise “Dudaj Construction”sh.p.k., z. Besnik Dudaj, me ankesen qe na ka adresuar. Me kontrata te rregullta dhe pas nje verifikimi te plote te te gjitha akteve te pronesise ne organet perkatese, kjo shoqeri ka blere nje siperfaqe toke prej 59.000 m2 ne Gjirin e Lalzit, Durres, prone e regjistruar ne ZRPP- te te njejtit rreth. Per zbatimin e projektit te tyre te investimit mbi kete siperfaqe, qe eshte ne shumen 4.89 milion euro, subjekti ka marre nje kredi bankare prej 8 milion euro. Pikerisht keto investime po pengohen nga miratimi i ligjit nr.9948, dt.07.07.2008 “Per shqyrtimin e vlefshmerise ligjore te krijimit te titujve te pronesise mbi token bujqesore”, ku parashikohet qe Komisionet Vendore te Verifikimit, prane prefekteve  te çdo qarku, nepermjet shfuqizimit te Akteve te Marrjes se Tokes ne Pronesi apo ne Perdorim, ne rruge administrative, te marrin kompetencat e pushtetit gjyqesor.

Te dy subjekte e lartpermendur, mendojne se fryma e ketij ligji dhe nene te veçante te tij, bien ndesh me Kushtetuten e Republikes se Shqiperise.

Ne nenin 1 te Ligjit te lartpermendur, parashikohet qellimi i tij :

“Ky ligj ka per qellim te percaktoje :

a) shqyrtimin e vlefshmerise ligjore te titujve te pronesise mbi token bujqesore.

b) strukturat shteterore te ngarkuara per shqyrtimin e vlefshmerise

ligjore te krijimit te titujve te pronesise mbi token bujqesore, te dhene ne pronesi personave fizike ose juridike, vendas, si dhe detyrat e pergjegjesite e ketyre strukturave.”

Ndersa ne nenin 2 “Objekti i vlefshmerise ligjore te tokes ne pronesi” parashikohet qe :

1.      Kanë vlefshmëri ligjore titujt e pronësisë private mbi tokën,

te krijuar te :

a) sipërfaqet, që më 1.8.1991 kanë figuruar në regjistrat kadastralë, ne zërin "Tokë bujqësore" dhe janë përfshirë në territoret e administruara nga ish-kooperativat bujqësore deri në kohën e hyrjes në fuqi të ligjit nr.7501, datë 19.7.1991 "Për tokën", të ndryshuar;

b) sipërfaqet e tjera të tokave bujqësore, të administruara nga ish-ndërmarrjet bujqësore dhe institucionet e tjera shtetërore, të kaluara për ndarje për fshatrat e ish-kooperativave bujqësore vetëm me miratim të Ministrit të Bujqësisë dhe Ushqimit, deri në kohën e hyrjes në fuqi të ligjit nr.8337, datë 30.4.1998 "Për kalimin në pronësi të tokës bujqësore, pyjore, livadheve dhe kullotave";

c) sipërfaqet e tokave bujqësore të ish-NB-ve, sipas dispozitave të përcaktuara në ligjin nr.8053, datë 21.12.1995 "Për kalimin në pronësi, pa shpërblim, të tokës bujqësore".

2) Nuk kanë vlefshmëri ligjore titujt e pronësisë në të gjitha sipërfaqet e tjera, që më 1.8.1991 nuk kanë figuruar në regjistrat kadastralë, në zërin "Tokë bujqësore", si pyje, livadhe, kullota, tokë pyjore dhe sipërfaqe të tjera të tokës jobujqësore, pavarësisht miratimit të ndryshimeve dhe kalimeve të këtyre zërave në tokë bujqësore pas kësaj date.”

Per realizimin e ketij qellimi, verifikimit te titujve te pronesise mbi token bujqesore, krijohet Komisioni Qeveritar i Tokes (me poshte, KQT) i kryesuar nga Zevendeskryeministri (neni 5) dhe Komisionet Vendore prane Prefektit te çdo qarku, qe drejtohen nga nje Drejtor dhe jane nen autoritertin dhe varesine e e drejtperdrejte te Prefektit :

“1-KV-ja krijohet pranë prefektit të çdo qarku dhe drejtohet nga drejtori i KV-së, nën autoritetin dhe varësinë e drejtpërdrejtë të prefektit.

2-KV-ja drejton të gjithë veprimtarinë për shqyrtimin e vlefshmërisë së krijimit të titujve të pronësisë mbi tokën bujqësore, në juridiksionin e prefekturës, nëpërmjet:

a)     shqyrtimit dhe verifikimit të ankesave, kërkesave, informacioneve

 që i paraqiten nga shtetasit dhe strukturat shtetërore, veprimtaria e të cilave lidhet me pronësinë mbi tokën bujqësore:

b)     kontrolleve të drejtpërdrejta, të ushtruara me nismën e vet,

mbi veprimtarinë dhe veprimet e kryera nga ish-komisionet e tokës, të të gjitha niveleve, në procesin e ndarjes së tokës. Këto kontrolle kryhen të plota në sipërfaqen e tokave të ish-NB-ve dhe të zonës së zhvillimit me përparësi të turizmit, të përcaktuara sipas ligjit nr. 7665, datë 21.1.1993 "Për zhvillimin e zonave, që kanë përparësi turizmin", të ndryshuar dhe akteve nënligjore në zbatim të tij

c)-vendimeve që merr në mbledhjet që thirren dhe drejtohen nga prefekti.

ç)-zbatimit të detyrave dhe vendimeve të KQT-së”

Duke u nisur nga permbajtja e neneve sipercituar, si dhe nga permbajtja e nenit 17 te Ligjit, qe e vlereson te perfunduar krijimin e titujve te pronesise mbi token bujqesore ne daten e hyrjes ne fuqi te ketij ligji, me perjashtim te pikave 3, 4, 5 dhe 6 te nenit 8 te Ligjit, nuk eshte e veshtire te kuptohet se me kete Ligj nuk eshte bere gje tjeter, veçse merret persiper verifikimi, shqyrtimi dhe dergimi ne gjykate i kerkeses per anullimin e aktit administrativ, aktit te marrjes se tokes ne pronesi, per te te gjitha Aktet e Marrjes te Tokes Bujqesore ne Pronesi qe nga viti 1993, e drejte qe eshte atribut i pushtetit gjyqesor. Ky ligj, ne baze te Kodit te Proçedurave Administrative, mund te legjitimonte vlefshmerine ose jo, vetem te Akteve te Marrjes se Tokes ne Pronesi, qe per shkaqe te ndryshme, nuk jane regjistruar ne ZRPP te rrethit.

Sipas mendimit te Avokatit te Popullit ky ligj le shteg te gjere per abuzime, subjektivizem dhe selektivitet gjate zbatimit te tij.

Ligji ne teresine e tij, perveç te tjerave, paralelizon dhe zevendeson dispozitat e Kushtetutes dhe te Kodit Civil me ato te Kodit te Proçedurave Administrative. Ligji nr.9948, dt. 07.07.2008 “Per shqyrtimin e vlefshmerise ligjore te krijimit te titujve te pronesise mbi token bujqesore” krijon struktura shteterore, paralele me gjykatat. Komisioni Qeveritar i Tokave dhe Komisionet Vendore prane Prefektit ne qarqe, sipas neneve 6, 7, dhe 8 te Ligjit, ushtrojne kompetenca te tilla, si “zgjidhin mosmarreveshjet midis shtetasve”, “zgjidhin konflikte juridiksionale” dhe “japin ose heqin tituj pronesie”; kompetenca qe jane ekskluzive per pushtetin gjyqesor.

1. Ligji eshte ne kundershtim parimin e sigurise juridike.

 Neni 10 i Ligjit te lartpermendur, cenon elementet dhe tiparet themelore te parimit te sigurise juridike, krijon ambient pasigurie per nje mase shume te madhe pronaresh, humbet besueshmeria e shtetasve tek shteti, nuk jep garanci per vijueshmeri dhe per ndryshime legjislacioni ne perputhje me Kushtetuten.

Me ligjet nr.7501, dt.19.07.1991 “Per token”, i ndryshuar, nr.8053, dhe ate me dt.21.12.1995 “Per kalimin ne pronesi, pa shperblim, te tokes bujqesore” dhe me akte te tjera nenligjore, shume subjekte kane fituar te drejten e pronesise mbi token bujqesore. Ndersa me Ligjin qe kontestojme per papajtueshmeri me Kushtetuten, organet administrative kane te drejten te verifikojne, shqyrtojne dhe anullojne titujt e pronesise. Ligjvenesi nuk mund te perkeqesoje ne menyre te paarsyeshme gjendjen ligjore te personave, te mohoje te drejtat e fituara ose te shperfille interesat legjitime te tyre. Ne nje shoqeri me kah demokratik, ligji duhet te garantoje siguri, qartesi dhe vazhdimesi ne menyre qe individet t’i drejtojne veprimet e tyre ne menyre korrekte e ne perputhje me te dhe, nga na tjeter, vete ligji te mos qendroje statik nese duhet t’i jape forme nje koncepti, siç eshte ai i drejtesise, ne nje shoqeri qe ndryshon me shpejtesi. Çdo shoqeri qe synon nxitjen dhe mbrojtjen e te drejtave te njeriut, ka si parim thelbesor epersine e ligjit. Rregullime ligjore mund te kryhen vetem ne perputhje me nje proçedure te percaktuar me pare dhe pa cenuar parimet dhe normat kushtetuese. Parimi i sigurise juridike duhet respektuar nga te gjitha institucionet dhe se pari nga vete Kuvendi.

Ligji nr.9948, dt.07.07.2008 ben pikerisht te kunderten e kesaj kerkese te parimit te sigurise juridike dhe perkeqeson ne menyre te paarsyeshme gjendjen ligjore te shtetasve, pasi u heq atyre te drejten e prones. Nenet 2, 3 dhe 4, ne korelacion me nenin 9 dhe 10 te Ligjit krijon bazen ligjore te heqjes se titullit te pronesise, te dhene qe para shume vitesh. Ligji nuk merr parasysh afatet e parashkrimit te padise, neni 103 i Kodit Civil, dhe ato per fitimin me parashkrim fitues te prones, me mirebesim dhe ne baze te nje veprimi juridik qe nuk eshte i ndaluar nga ligji, neni 168 po i Kodit Civil. Parimi i sigurise juridike cenohet, perveç sa me lart, edhe per faktin se Ligjit i eshte dhene fuqi prapavepruese. Nenet 2, 3, dhe 4 vendosin kritere per vlefshmerine e veprimeve juridike te kalimit ne pronesi te tokes bujqesore, duke anashkaluar kriteret e pavlefshmerise se veprimit juridik dhe pasojave, te parashikuara ne nenet 92-111 te Kodit Civil. Dhenia e fuqise prapavepruese ketyre neneve, te kritereve te reja qe vendosin, perkeqeson gjendjen juridike te pronareve te tokes bujqesore, sepse as parashkrimi fitues nuk i mbron nga veprimet dhe vendimet e Komisioneve Vendore dhe Komisionit Qeveritar te Tokes.

2. Ligji eshte ne kundershtim edhe me nenin 7 te Kushtetutes, norme qe parashikon nje nga parimet baze mbi te cilin organizohet dhe funksionon nje shtet me tipare demokratike, ate te ndarjes dhe ballancimit te pushteteve :

“Sistemi i qeverisjes ne Republiken e Shqiperise bazohet ne ndarjen dhe balancimin ndermjet pushteteve ligjvenes, ekzekutiv dhe gjyqesor” .

Me kete nen, pushteti kufizohet, kontrollohet dhe ndahet midis organeve te ndryshme sipas funksioneve te ndryshme; çdo organi kushtetues i jepet nje funksion i qarte aktiv dhe njekohesisht parandalohen abuzimet e ndryshme. Dhenia e drejtesise eshte e ndare nga organet dhe drejtuesit e organeve qe marrin vendime me karakter politik, qofshin te pushtetit ekzekutiv apo legjislativ. Klasifikimi i pushteteve e mbron shtetasin nga arbitrariteti dhe i lehteson atij njekohesisht te kuptuarit e proçesit te qeverisjes. Vetem fakti, qe organet ekzekutive kane marre kompetencat e pushtetit gjyqesor, eshte i mjaftueshem per t’a shpallur si antikushtetues Ligjin nr. 9948, dt. 07.07.2008 “Per shqyrtimin e vlefshmerise ligjore te krijimit te titujve te pronesise mbi token bujqesore”. Ligji nuk dallon as ato raste kur gjykatat jane duke shqyrtuar konfliktet e pronesise se tokes bujqesore. Ne keto kushte veshtiresohet perfundimi i proçeseve gjyqesore, krijohen zvarritje dhe, me e keqja : Prefekti perseri mund ta anulloje titullin e pronesise, Aktin e Marrjes se Tokes ne Pronesi.

Duke ja deleguar te drejten e konstatimit te vlefshmerise se titujve te pronesise pushtetit ekzekutiv (komisioneve vendore dhe prefektit), ligji e ve pushtetin gjyqesor ne poziten e riverifikuesit te pavlefshmerive te titujve te pronesise, duke denatyralizuar arsyen e ekzistences se tyre dhe shkelur rende parimin e ndarjes dhe ballancimit te pushteteve.Ne kete menyre krijohet nje preçedent i ri, teper negativ, qe per arsye te ndryshme te çelen, here pas here, proçedura rishqyrtimi dhe riverifikimi per shume raste te tjera. Verifikimi i vlefshmerise se titujve te pronesise mbi token bujqesore, pa nje proçes te rregullt gjyqsor, ka cenuar rende te drejten kushtetuese te gezimit, posedimit dhe disponimit te prones private nga pronari. Shteti, me anen te funksionit te tij ligjvenes, vendos norma qe perbejne rendin e tij juridik. Ndersa me anen e funksionit gjyqesor, garanton mbrojtjen e te drejtave dhe normave kryesore me qellimin e vetem te sigurimit te nje jete normale sociale per njerezit.

Nga ana tjeter Ligji penalizon mbajtesin e titullit te pronesise per gabime apo shtremberime ne zbatimin e ligjit nga ish komisionet e tokave, gje qe bie ndesh me funksionimin normal te shtetit te se drejtes dhe cenon garantimin e te drejtave dhe lirive te individit.

Keto garanci jane jo vetem ne kuptimin proçedurial, por edhe ne kuptimin thelbesor te atyre çeshtjeve qe i paraqiten.

3. Ligji eshte ne kundershtim me nenin 41 te Kushtetutes ne te cilin parashikohet mbrojtja dhe garantimi i nje prej te drejtave themelore te njeriut, ajo e prones private.

“1) E drejta e prones eshte e garantuar.

  2) Prona fitohet me dhurim, me trashegimi, me blerje dhe me çdo menyre tjeter klasike te parashikuar ne Kodin Civil.

 3) Ligji mund te parashikoje shpronesime ose kufizime ne ushtrimin e e se drejtes se prones vetem per intreresa publike”

Pronesia, si e nje e drejte per te gezuar dhe disponuar lirisht sendin,  brenda kufinjve te caktuar nga ligji, si nje maredhenie juridike civile pasurore, eshte jo vetem nje nga te drejtat me kryesore te njeriut, nje nga menyrat e begatimit te tij dhe qe mbart nje bagazh te madh trajtimi teoriko-juridik, por edhe elementi baze i nje shoqerie demokratike te bazuar ne ekonomine e tregut te lire dhe te konkurences se ndershme. Si e tille prona ka garancine e nje mbrojtjeje te veçante ne Republiken e Shqiperise, ne ate mase, parametra dhe mjete ligjore si ne te gjitha vendet e tjera te zhvilluara. Ligjvenesi, per keto dhe shkaqe te tjera, nuk ka bere dallim ne Kushtetute, persa i takon mbrojtjes nga çdo dhunim, midis prones private dhe asaj shteterore ose publike.               

Ne nenin 153 te Kodit Civil, ne menyre taksative parashikohet se : “Askush nuk mund te shpronesohet ose t’i kufizohet e drejta e ushtrimit te se drejtes se prones qe barazohet me shpronesimin, perveçse kur kete e kerkojne interesat publike dhe kurdohere kundrejt nje shperblimi te plote dhe paraprak”.

Ka shume subjekte qe gjate viteve 1993-2009 kane fituar pronesine e tokes bujqesore me vendim gjyqesor te formes se prere. Edhe ne keto raste, Ligji tregon prepotence, me shfuqizimin qe ju ben faktikisht, vendimeve gjyqesore te formes se prere.

Kushtetuta, ka prevalence te dispozitave te saj ndaj atyre ligjore. Ajo permban ate qe konsiderohet kushtetueshmeri dhe hierarki e rendit juridik. Ligjshmeria nenkupton ndertimin e raporteve te veçanta midis pushtetit dhe shtetasve ne baze te ligjit, garantimin e te drejtave te njeriut, respektimin e ligjit edhe nga organet e administrates shteterore. Neni 296 i Kodit Civil, sansionon qe : “Pronari ka te drejte te ngreje padi per te kerkuar sendin e tij nga çdo posedues apo mbajtes. Kete te drejte e ka edhe çdo bashkepronar per sendin e perbashket, me qellim qe ai t’i dorezohet gjithe bashkepronareve”

4. Ligji eshte ne kundershtim edhe me nenin 42/2 te Kushtetutes, 

“1) Liria, prona dhe te drejtat e njohura me Kushtetute  dhe me ligi nuk mund te cenohen pa nje proçes te rregullt ligjor.

  2) Kushdo, per mbrojtjen e te drejtave, te lirive dhe te interesave te tij kushtetues dhe ligjore, ose ne rastin e akuzave te ngritura kunder tij, ka te drejten e nje gjykimi te drejte dhe publik brenda nje afati te arsyeshem nga nje gjykate e pavarur dhe e paanshme e caktuar me ligj”

Keshtu garantohet nderhyrja e pushtetit gjyqsor per te mbrojtur te drejtat, lirite dhe interesat kushtetuese dhe ligjore te individeve. Gjykata Kushtetuese, me vendimin e saj nr.32, te vitit 2003, ka konstatuar se, kontrolli gjyqesor ndaj akteve me karakter administrativ, duke qene shprehje e parimit te kontrollit dhe ballancimit te pushteteve e duke qendruar ne themel te pavaresise se organeve, ka ndryshime thelbesore nga kontrolli administrativ qe kryhet ne rruge hierarkike apo nga organe te krijuara posaçerisht. Aksesi per t’iu drejtuar gjykates eshte nje nga elementet e se drejtes per nje proçes te rregullt gjyqesor.

5. Neni 15/1 i Kushtetutes sanksionon se :

“ Te drejtat dhe lirite themelore te njeriut jane te pandashme, te patjetersueshme e te padhunueshme dhe qendrojne ne themel te te gjithe rendit juridik

Organet e pushtetit publik, ne permbushje te detyrave te tyre, duhet te respektojne te drejtat dhe lirite themelore te njeriut, si dhe te kontribuojne ne realizimin e tyre.”

Ish komisionet e Tokave, te krijuara ne fshat, komune, bashki, qark dhe ne qeveri, ishin strukura shtetrore ekzekutive ne zbatim te Ligjit nr.7501, dt.19.07.1991 “Per token” dhe atij me nr.8053, dt.21.12.1995 “Per kalimin ne pronesi pa shperblim te tokes bujqesore”, dhe te tilla duhej te mbeteshin deri ne fund te proçesit.

Gjate gjithe segmentit kohor nga nxjerrja e aktit administrativ deri ne ekzekutimin e tij, organi kompetent ka te drejte ta revokoje apo ta shfuqizoje ate. Akti administrativ i Komisioneve, Akti i Marrjes se Tokes ne Pronesi, i ka sjelle pasojat e tij juridike me regjistrimin ne ZRPP te rrethit. Ne kete moment, akti administrativ nga nje maredhenie juridike individ-administrate publike, shndrohet ne nje maredhenie juridike pronesie, midis te njejtit individ dhe prones. Ketu eshte edhe kufiri qe e ndan proçeduren administrative dhe pushtetin ekzekutiv nga pushteti tjeter, ai gjyqesor.

6. Neni 17 i Kushtetutes parashikon se :

“Kufizime te te drejtave dhe lirive te parashikuara ne kete Kushtetute mund te vendosen vetem me ligj per nje interes publik dhe per mbrojtjen e te drejtave te te tjereve. Kufizimet duhet te jene ne perpjestim me gjendjen qe e ka diktuar ate.

Keto kufizime nuk mund te cenojne thelbin e lirive dhe te drejtave dhe ne asnje rast nuk mund te tejkalojne kufizimet e parashikuara ne Konventen Europiane per te Drejtat e Njeriut”.

 Ne kete menyre disiplinohen kufizimet qe mund t’u behen te drejtave dhe lirive kushtetuese te individeve, kufizime qe nuk mund te cenojne thelbin e te drejtave, ku e drejta e prones eshte nga me thelbesoret.

7. Neni 5 i Kushtetutes afirmon qarte faktin qe :

“Republika e Shqiperise zbaton te drejten nderkombetare te detyrueshme per te”.

Me ratifikimin e Konventes Europiane per te Drejtat e Njeriut, kjo e fundit eshte inkluduar ne legjislacionin tone te brendshem, te detyrueshem per zbatim. Ne nenin 1, te Protokollit nr.1 te Konventes, parashikohet qe çdo person fizik apo juridik ka te drejten qe t’i respektohet pasuria e tij. Askush nuk mund te privohet nga prona e tij, perveçse per arsye te interesit publik dhe ne kushtet e parashikuara nga ligji dhe nga parimet e pergjithshme te se drejtes nderkombetare. Protokolli 1 i Konventes Europiane per te Drejtat e Njeriut, garanton te drejten e garantimit te pacenueshem te prones, qe ne rastin konkret eshte anashkaluar.

Edhe Vendimi i Keshillit te Ministrave nr.1269, dt.17.09.2008 “Per perberjen, menyren e funksionimit dhe detyrat e pergjegjesite e strukturave shtetrore te ngarkuara per shqyrtimin e vlefshmerise ligjore  te krijimit te titujve te pronesise mbi token bujqesore”, per te njejtat arsye, ka te njejten papajtueshmeri me Kushtetuten si dhe Ligji, ne mbeshtetje dhe per zbatim te te cilit ka dale, prandaj duhet shfuqizuar si antikushtetues.

Ne keto kushte, ne baze te nenit 131, germa “dh” te Kushtetutes se Shqiperise dhe nenit 24, germa “c” te Ligjit nr.8454, dt.04.02.1999 “Per Avokatin e Popullit”, i ndryshuar :

                                                            K E R K O J M E

1) Shfuqizimi si, antikushtetues te Ligjit nr.9948, dt.07.07.2008, “Per shqyrtimin e vlefshmerise ligjore te krijimit e titujve te pronesise mbi token bujqesore.”, si dhe te Vendimit te Keshillit te Ministrave nr.1269, dt.17.09.2008 “Per perberjen, menyren e funksionimit dhe detyrat e pergjegjesite e strukturave shtetrore te ngarkuara per shqyrtimin e vlefshmerise ligjore te krijimit te titujve te pronesise mbi token bujqesore”.

2) Pezullimin e Ligjit nr. 9948, dt. 07.07.2008, “Per shqyrtimin e vlefshmerise ligjore te krijimit e titujve te pronesise mbi token bujqesore.” dhe te Vendimit te Keshillit te Ministrave nr.1269, dt.17.09.2008 “Per perberjen, menyren e funksionimit dhe detyrat e pergjegjesite e strkturave shtetrore te ngarkuara per shqyrtimin e vlefshmerise ligjore te te krijimit te titujve te pronesise mbi token bujqesore”.

                                       KERKUESI

                                           AVOKATI I POPULLIT

                                            Ermir DOBJANI