Tiranë, më 19/01/2005

KONFERENCA PER SHTYP E AVOKATIT TE POPULLIT TE SHQIPERISE, Z. ERMIR DOBJANI,

DHE OMBUDSMANIT TE DANIMARKES, Z. HANS GAMMELTOFT HANSEN 

Hapja:  Zedhenesi i Avokatit te Popullit

Zedhenesi:

Faleminderit per pjesemarrjen dhe mbulimin mediatik qe i keni bere ketij aktiviteti. Sikunder tashme e dini, qëllimi i vizitës se z.Gameltoft Hansen ishte që të bëhej nje analizë e arritjeve të këtij institucioni për këto 5 vjet punë që është zhvilluar dhe për të përcaktuar drejtimet ku ne duhet të përqëndrohemi ne te ardhmen.

Fjala e z. Ermir Dobjani:

Të nderuar përfaqësues të Medias,

Ju falenderoj për ndjekjen dhe përcjelljen mediatike të vizitës së Ombudsmanit të Danimarkës si dhe pjesëmarrjen në këtë Konferencë shtypi.

          Zoti Gammeltoft Hansen është një nga Ombudsmanët më të vjetër në Evropë. Prej 18 vjetësh ai drejton një ndër zyrat më të mira të Ombudsmanëve në botë. Kjo është vizita e tij e 4-t në Shqipëri dhe tregon së pari për vlerësimin dhe rëndësinë që ai i ka kushtuar ngritjes dhe forcimit të Zyrës së re të AP në Shqipëri.

          Në shtator 2000, ndërsa unë kisha 6 muaj që isha zgjedhur dhe zyra vetëm tre muaj që funksiononte, z. Gammeltoft Hansen ishte i pari Ombudsman që erdhi tek ne për të na inkurajuar dhe ofruar ndihmën dhe përvojën e tij si dhe të zyrës së tij.

          Qysh nga ajo kohë kanë kaluar thuajse 5 vjet, dhe sot me kënaqësi konstatoj se zyra jonë në Shqipëri, në të gjithë organizimin dhe veprimtarinë e vet është bazuar në modelin danez. Kjo është rrjedhojë e ndihmës së pakursyer të qeverisë daneze, në kuadër të projektit DANIDA, që ka investuar rreth 800 000 USD për zyrën tonë, si dhe të punës personale që ka bërë z. Gammeltoft Hansen dhe stafi i tij për ne.

          Në këto pesë vjet ne kemi zgjidhur mbi 15 000 ankesa, nga të cilat rreth 20 përqind janë zgjidhur në favor të qytetarëve. Kjo shifër tregon për besimin që ka publiku shqiptar tek ne, por njëkohësisht është tregues mjaft pozitiv i administratës publike shqiptare, e cila ka mirëpritur rekomandimet e Institucionit te Avokatit të Popullit.

          Gjithashtu, ne falenderojmë Parlamentin shqiptar, të gjitha grupet parlamentare dhe forcat politike që ato përfaqësojnë, qeverinë shqiptare, që kanë mbështetur dhe inkurajuar fort veprimtarinë e Avokatit të Popullit. Gjithashtu vlerësoj mbështetjen e faktorit ndërkombëtar prezent në Shqipëri për mbështetjen që i ka dhënë Avokatit të Popullit.

          Ne sot jemi anëtarë të tre organizatave të Ombudsmanëve dhe Mediatorëve në botë, dhe kemi lidhje me rreth 100 institucione homologe. Por mbi të gjitha kemi patur dhe vazhdojmë të kemi lidhje dhe mbështëtje nga zyra e z. Gammeltoft Hansen, me të cilin ndajmë suksesin tonë.

          Me këtë rast falenderoj Mediat shqiptare për mbështetjen që i kanë dhënë institucionit të Avokatit të Popullit gjatë këtyre 5 viteve.

Fjala e Ombudsmanit te Danimarkes, Hans Gammeltoft Hansen:

Të nderuar zonja dhe zotërinj të medias. Më vjen keq që unë nuk flas shqip. Kjo është vizita e katërt e imja në Shqipëri.

Sikundër jua shpjegoi dhe z. Dobjani, unë jam prej 18 vjetësh, Ombudsman në Danimarkë, ndërkohë që Institucioni ka 50 vjet që është krijuar. Në zyrën e Ombudsmanit Danez tashmë është konsoliduar një traditë për të mbështetur dhe asistuar ngritjen e institucioneve të Ombudsmanit, pra Avokatit të Popullit, pothuajse në çdo pjesë të botës.

Ka qënë njëkohësisht e frutshme, tepër e kënaqshme pjesëmarrja jonë për ngritjen dhe mirëfunskionimin e zyrës së Avokatit të Popullit në Shqipëri.

Duke ju referuar edhe standarteve ndërkombëtare, unë ju falenderoj Juve për lehtësimin në ngritjen e këtij institucioni tepër të efektshëm.

Bashkëpunimi me Zyrën e Avokatit të Popullit dhe veçanërisht me z. Dobjani ka qënë vërtete tepër frymëzues.

Unë vij nga një vend ku koncepti i Ombudsmanit është krijuar prej vitesh dhe natyrisht e kam parasysh edhe zhvillimin e këtij koncepti tashmë edhe në vendet të tjera, si në Shqipëri.

Pyetje e gazetares se TVA:

Si e konsideroni veprimtarine e Avokatit të Popullit dhe a keni ndonje verejtje?

z. Gammeltoft Hansen:

Unë jam i mbreslënë, pra i impresionuar nga suksesi dhe nga arritjet e zyrës së Avokatit të Popullit, pra te zyrës së zotit Dobjani. Keshtu, personalisht mezi pres të vazhdoj bashkëpunimin midis zyrës së Avokatit të Popullit dhe zyrës time si dhe vendeve te tjera nordike.

Z.Ermir Dobjani:

Në 5 vjet kemi punuar për ta ngritur këtë institucion kur nuk ekzistonte, kur nuk kishte as zyrë, asgjë. Një institucion i cili në çdo vend të botës ekziston prej vitesh, pra ku mbrojtja e të drejtave dhe lirive të njeriut eshte nje koncept i konsoliduar. Kuptohet që derisa kemi ardhur deri këtu dhe gëzojmë mbështetjen e faktorit ndërkombëtar natyrisht dhe të organizmave qeveritare, do te thote se është bërë një punë mjaft e mirë, dhe që të flasësh për të mirat dhe dobësitë e këtij institucioni duhet një analizë e gjërë. Por unë them që më mirë duhet të ishim përqëndruar në problemet më themelore që qëndrojnë sot para njerëzve tanë në Shqipëri.

Pyetje per Ombudsmanin e Danimarkes:

Çfare mund te na thoni tjeter per punen e Avokatit te Popullit ne Shqiperi?

z. Gammeltoft Hansen:

Duke kujtuar atë ç’ka unë kam lexuar për Ombudsmanin e Parë në Danimarkë, pra këtu e 50 vjet më parë, ai ka qënë rizgjedhur dhe ka qëndruar në atë pozicion për 16 vjet me rradhë, çka i dha edhe atij mundësinë për të stabilizuar dhe zhvilluar zyrën e tij. Ajo çka unë kam parë nga afër gjatë këtyre 5 viteve të veprimtarisë së Avokatit të Popullit në Shqiperi më ka impresionuar, aq më tepër duke ditur se sa vështirësi dhe komplikime, Ombudsmani i parë, ne secilin vend të botës, do të kishte. Pra shkurt dhe kjo është për çdo Ombudsman në botë, por sidomos atë të vendit tuaj, në një farë mënyre Ombudsmanëria, pra arti i Ombudsmanit është një art i mbajtjes së ekuilibrave. Nga njëra anë Ombudsmani duhet të jetë një rojtar i te drejtave të njeriut dhe i mirëqeverisjes dhe natyrisht që ai nuk duhet të trembet për të marrë dhe trajtuar çështjet që mund të jenë, le të themi, kundërthënëse dhe problematike. Nga ana tjetër është shumë e rëndësishme që Ombudsmani të sigurojë pranueshmërinë nga ana e organeve të administratës, të cilët atij do t’i duhet t’i kontrollojë. Prandaj unë këtë e quaj art të mbajtjes së ekuilibrave, dhe kjo ka më tepër rëndësi për Ombudsmanin e Parë, i cili natyrisht që duhet të hedhë gjurmët e para. Natyrisht që ju më pyetët për ndonjë koment tjetër me punën e kolegut tim z.Dobjani për këto 5 vjet. Unë e konsideroj z.Dobjani një artist të madh që ka performuar artin e mbajtjes së ekuilibrave.

Pyetje e gazetares:

Çfare keni për të thëne në lidhje me kandidatin tjetër të propozuar për Avokat të Popullit dhe së dyti, a keni patur vështirësi dhe presione gjatë punes tuaj?

z.Ermir Dobjani:

Unë nuk kam absolutisht asgjë kundër me kandidatin e shfaqur dhe me cilindo kandidat tjetër që do të dalë. Është e drejta e gjithësecilit të konkurojë, është e drejta e çdo deputeti të mbështesë kandidatët që kërkojnë mbështetje prej tyre. Unë kam këtë për të thënë që do të ishte mirë që proçesi i zgjedhjes së Ombudsmanit të mos përfshihej në lojën politike. Kjo do të ishte një kënaqësi e imja. Përsa i përket punës për rreth 15 mijë ankesa që kanë ardhur në zyrën tonë kuptohet nuk ka qënë e lehtë të punoje sepse në fund të fundit për të gjitha këto shkelje janë ankuar qytetarët për institucionet qeveritare qëndrore dhe lokale. Dhe natyrisht askujt nuk i pëlqen të kritikohet dhe t’i rekomandohen zgjidhje që bien ndesh me ato për të cilat ankohen qytetarët. Por e rëndësishme ka qënë që ne kemi ruajtur balancat, ashtu siç shpjegoi kolegu im, kemi bërë një punë të paanshme, me mjaft profesionalitet, dhe kemi fituar mbështetjen si të opinionit, si të ankuesve, ashtu dhe të institucioneve të cilat janë kritikuar nga ana jonë.

Zedhenesi:

Meqë nuk ka më pyetje, ju falenderojme, duke kujtuar para jush një të vertetë se një Ombudsman është aq i zoti sa ç’është i aftë per t’u bërë i njohur. Ju keni kontributin tuaj ne kete drejtim. Faleminderit dhe mirupafshim.