Datë 09/06/2004

INTERVISTË E AVOKATIT TË POPULLIT Z. ERMIR DOBJANI ME GAZETARIN GREK TE NET TV GEORGE KAUVAROS

Z.George Kauvaros: 

Ç’mund të thoni për problematikën e trafikimit të fëmijëve në Shqipëri dhe Greqi ?

Z. Ermir Dobjani: 

Në radhë të parë unë falenderoj televizionin tuaj dhe ju personalisht, për marrjen në konsideratë të çështjes së trafikimit të fëmijëve shqiptarë për zgjidhjen e këtij problemi, sidomos tani para lojrave olimpike në Greqi. Është e vërtetë që këto vite tranzicioni në Shqipëri, pra dhjetë dymbëdhjetë vitet e fundit, çështja e trafikut të fëmijëve shqiptarë, por jo vetëm shqiptarë, por dhe nga vende të tjera ish komuniste, është një problem i madh shqetësues. Me të drejtë shqetëson gjithë vendet ballkanike, por në veçanti Greqinë, që është vendi ku një pjesë e madhe e këtyre fëmijëve kanë mbetur, të shtyrë apo jo nga prindërit e tyre, jo vetëm për t’u trafikuar, por dhe për të kryer punë të ndershme, dhe që dashje pa dashje shpesh herë kanë rënë edhe pre e trafikantëve, duke u shfrytëzuar për lypësi, prostitucion dhe për punë të tjera. Faktikisht, numri më i madh i këtyre fëmijëve që kanë vajtur në Greqi ka qënë para vitit 2000. Deri diku pati fluks rreth vitit 1997, 1998, por mund të them që këto vitet e fundit ky trafik është bërë më i stërholluar, sidomos për trafikun e foshnjeve dhe të bebeve etj. Mund të them që ky trafik ka ardhur në rënie, sepse edhe shteti shqiptar, çdo vit e më tepër po merr masa shumë të rrepta për ta parandaluar këtë trafik dhe për të vënë para përgjegjësisë sidomos ata persona që janë implikuar dhe janë zbuluar se kanë bërë këtë trafik. Ne kemi njoftuar për këtë institucionet përkatëse, që në janarin e vitit të kaluar, pasi u vumë në dijeni nga gazetat shqiptare, referuar gazetës “The Indipendent”, sipas së cilës ishin rreth 800 fëmijë, të cilët ishin strehuar, por që përsëri ishin larguar nga Agi Varvara në Greqi. Të shqetësuar për këtë çështje, ne menjëherë problemin ja deleguam për hetime zyrës së Ombudsmanit Grek. Mund të them paraprakisht që kemi një bashkëpunim shumë të mirë dhe falenderoj për një punë të lavdërueshme që kanë bërë për këtë çështje, por dhe për çështje të tjera që ka dërguar zyra jonë. Pas rreth një viti, që bënë hetimet e tyre, në 6 maj të këtij viti zyra e Ombudsmanit Grek na dërgoi një raport të hollësishëm në lidhje me Agi Varvarën. Rezultoi që në vitin 1998-2002 në këtë qendër janë strehuar rreth 640 fëmijë, por që faktikisht këto fëmijë, mbasi janë strehuar në Agi Varvara, përsëri janë larguar në pjesën më të madhe dhe nuk dihet në ç’drejtim kanë vajtur dhe në dorë përsëri të kujt kanë rënë. Paraprakisht, që në vitin 1998 është bërë një projekt me qëllim shumë të mirë nga ana e Ministrisë së Mirëqënies Sociale të Greqisë dhe Ministrisë së Rendit të Greqisë për të sistemuar fëmijë të cilët ishin pa strehë dhe ishin pa kujdes. Në Greqi nuk flitet vetëm për fëmijët shqiptarë, por kishte edhe të nacionaliteteve të tjera dhe që policia, pasi i kapte, i sistemonte në Agi Varvara. Por problemi ishte, sepse ky projekt, ndonëse me qëllim të mirë, nuk u justifikua me marrjen e masave të duhura organizative dhe teknike që projekti të përfundonte si duhej. Pra, për fëmijët që strehoheshin në Agi Varvara të kujdeseshin kujdestarët që të mos binin përsëri në duart e njerëzve të cilët i shfrytëzonin ose që t’u dorëzoheshin autoriteteve të vendeve përkatëse si Shqipërisë, Maqedonisë, Bullgarisë. Rezulton që pjesa më e madhe e atyre fëmijëve janë larguar dhe nuk ka evidenca të sakta se në dorë të kujt kanë rënë këto fëmijë. Pra qëllimi i mirë i autoriteteve përgjegjëse greke nuk u justifikua me masat e marra dhe me rezultatin që realisht është konstatuar nga ana e zyrës së Ombudsmanit Grek.

Z.George Kauvaros: 

Pjestarë të policisë greke pohojnë se bashkëpunimin midis tyre dhe policisë shqiptare e pengon korrupsioni i këtyre të fundit.

Z.Ermir Dobjani: 

Unë nuk mund të kundërshtoj rastet e korrupsionit ndaj oficerëve ose policëve shqiptarë, por unë them që fajin e vet këtu e ka dhe policia e të dy vendeve, qoftë për mungesën e bashkëpunimit të duhur, qoftë dhe për afera korruptive me njeri tjetrin. Është e vërtetë që policia shqiptare ka mjaft të meta në drejtim të përgatitjes, në drejtim të trajnimit të zbatimit të të drejtave të njeriut. Po kaq të meta ka edhe policia greke, bile unë mund të jap disa shembuj që dhe vetë autoritetet e larta greke, në takimet personale që kanë patur me mua kanë pranuar se policia greke ka nevojë për trajnime dhe sidomos në fushën e mbrojtjes së të drejtave të njeriut. Fjala vjen, unë mund të them që ka disa raste, që janë të njohura, për vrasje të shqiptarëve nga ana e policisë greke, ku nuk ka patur rast për të shkrepur armën, për të nxjerrë armën dhe për të përdorur armën kundër emigrantëve shqiptarë ose rrahje dhe plagosje të këtyre të fundit derisa kur kanë hyrë në kufirin shqiptar, këta persona janë dërguar në spital, ku ose u është hequr veshka, ose u janë bërë ndërhyrje kirurgjikale për t’u shpëtuar jetën. Dhe këtë gjë ne e themi, duke bërë antitezën me policinë italiane, sepse shqiptarë klandestinë ka edhe në Itali dhe në vëndet e tjera të Europës Perëndimore. Ata kalojnë kufirin, janë pa dokumenta, mund të kryejnë dhe krime, por shqiptarët në këto vende nuk i dëgjon të akuzojnë policët e atyre vendeve, pra Italisë, Gjermanisë etj, se i kanë vrarë ose i kanë keqtrajtuar apo nxjerrë armën për t’i qëlluar, kur nuk ka qenë nevoja, në një kohë që raste të tilla nga ana e policisë greke për fat të keq nuk janë të pakta.

          Faleminderit!