Tiranë, më 03/02/2005

INTERVISTË E AVOKATIT TË POPULLIT DHËNË STACIONIT "ZËRI I AMERIKËS"

Gazetarja : Z. Dobjani, Ju ndodheni këtu në Shtetet e Bashkuara për të marrë pjesë në Mëngjezin e Lutjeve. Çfarë kuptimi ka për juve dhe per institucionin që ju drejtoni ftesa për të marrë pjesë në këtë ceremoni të përvitshme.

Z. Ermir Dobjani : Ky është një eveniment i rëndësishëm edhe për institucionin e Avokatit te Popullit të Shqipërisë, sepse unë e vleresoj si dashamirësi të institucioneve dhe vlerësim të punës të institucionit të Avokatit të Popullit nga institucionet amerikane, konkretisht, nga Kongresi Amerikan që organizon Mëngjezin e Lutjeve.

          Gazetarja : Ju jeni në përfundim të mandatit tuaj të parë dhe me sa duket jeni kandidatura më e fortë dhe për mandatin e dytë, a mund të na thoni se cilat janë arritjet më të rëndësishme, mbase jo në detaje, por si institucion, për Avokatin e Popullit.

          Z. Ermir Dobjani : Unë vlerësoj që ky institucion ka ndikuar shumë për transparencën e punës së organeve të administratës, me qëllim që të ndikojë në mirëqeverisje, duke punuar fort me anë të rekomandimeve, sepse i vetmi mjet pune për Avokatin e Popullit, janë rekomandimet e kërkesat dhe të bëjë më të përgjegjshme administratën publike dhe gjithë institucionet që u drejtohet se ata duhet të jënë në shërbim të masave të Popullit dhe jo të jenë pronarë të të të drejtave të tyre.

          Gazetarja : Gjatë këtyre viteve në detyrën tuaj, cilat janë shkeljet më të shpeshta që ju keni hasur si nga administrata shtetërore, ashtu dhe nga bizneset private, ato pra që mund të kenë marrë formë të përsëritur ndaj personave ose grupeve të personave që janë ankuar tek Avokati i Popullit.

          Z. Ermir Dobjani : Unë mund të përmend që ankesa të shumta këto 5 vjet ne kemi patur lidhur me çështjet e diskutimit të vendimeve gjyqesore të formës së prerë, kemi patur ndaj organeve të policisë për forma të ndryshme keqtrajtimi dhe keqpërdorimi të pushtetit nga këto organe, kemi patur në lidhje me fushën e ambjentit, të ndërtimeve pa leje dhe të mosekzekutimit të vendimeve për prishjen e ndërtimeve pa leje, ose të cënimit të pronave të ndryshme të qytetarëve, kemi patur në fushën sociale dhe njëkohësisht mjaft ankesa kemi patur edhe në fushën e të drejtave të punonjësve. Gjatë këtyre 5 vjetëve të punës si institucion, Avokati i Popullit ka pritur rreth 15.000 ankesa, pas të cilave qëndrojnë shumë më tepër njerëz, sepse te ne një ankesë regjistrohet, por mund të jenë me qindra njerëz që përfitojnë, kur zgjidhet kjo ankesë. I bie mesatarisht që çdo ditë në zyrën tonë të bëhen rreth 20 ankesa qoftë me gojë ose me shkrim dhe është pozitive që në këto 5 vjet rreth 20 për qind e ankesave që janë pranuar, kanë qënë brenda juridiksionit të zyrës tonë dhe janë zgjidhur në favor të qytetarëve. Vendime të Këshillit të Ministrave, ose ligje të ndryshme janë ndryshuar, përmirësuar me rekomandimin e Avokatit të Popullit dhe që kanë përfituar mjaft. Mund të përmend vendimin e Gjykatës Kushtetuese që u dha pas kërkesës tonë, që vlera e truallit të tokës ish pronarëve të mos llogaritej ose të mos vlerësohej sipas çmimeve që vinte Qeveria, por sipas kërkesës dhe ofertës. Nga një gjë e tillë përfituan të gjithë pronarët. Shpesh herë ka ndodhur që në bazë të kërkesave dhe rekomandimeve tona, nëpunës ose zyrtarë policie janë shkarkuar, dërguar në gjyq. Mund të përmend mbi 50-60 policë, oficerë policie që janë ndëshkuar, ulur në detyrë ose dërguar në Prokurori vetëm mbi bazën e rekomandimeve të Avokatit të Popullit. Po kështu, ka patur raste në administratën publike, ku zyrtarë të ndryshëm janë ndëshkuar me masa disiplinore në bazë të rekomandimeve tona.

          Gazetarja: Organizata e të Drejtave të Njeriut Amnesty International sapo ka publikuar një raport dje, lidhur jo vetëm me trajtimin dhe keqtrajtimin nga ana e forcave të policisë, por edhe për mosndëshkimin e tyre nga autoritetet, nga Prokuroria. Sa shqetësues është ky problem dhe a keni patur juve ankesa që kanë lidhje pikërisht me këto dukuri në Shqipëri?

          Z. Ermir Dobjani : Shqetësimet e organizmave ndërkombëtare për mbrojtjen e të Drejtave të Njeriut, për keqtrajtimet nga forcat e policisë, janë me vend. Ne, gjatë punës tonë kemi qenë mjaft ekzigjentë ndaj ankesave për shkeljet e të drejtave të njeriut nga organet e policisë. Ne kemi patur mjaft rezultate në punën tonë, por mund të them që, nga viti në vit, këto shkelje kanë ardhur duke u ulur, pavarësisht se përsëri konstatohet nga raportet që ka shkelje. Por, po t’i shikosh në raport me vitin 2000, kur kemi nisur punën dhe tani nga viti në vit, organet e policisë po bëhen gjithmonë e më të përgjegjshme  në raport me respektimin e lirive dhe të të drejtave të njeriut. Natyrisht ka shumë punë për të bërë, sepse dhe në vendet me demokraci të zhvilluar vazhdon të ketë shkelje në këtë fushë, por unë mendoj që ne kemi ndikuar mjaft për këtë dhe vazhdojmë të kemi në qendër të vëmëndjes shkeljet e të Drejtave të Njeriut nga organet e policisë dhe të kontribuojmë mjaft për përmirësimin e rregullave dhe kushteve, me qëllim që këto shkelje të mos ndodhin. Problematike është gjendja në dhomat e paraburgimit, që akoma padrejtësisht administrohet nga ana e organeve të policisë, sepse faktikisht duhet të kishin kaluar me kohë në administrim të Ministrisë së Drejtësisë dhe ka ankesa dhe për keqtrajtime brenda këtyre dhomave, ka ankesa sidomos për kushtet në të cilët mbahen këta persona, kur ndalohen qoftë edhe për 24 orë ose për 72 orë, ose kur mbahen edhe me afate më të gjata. Ne po punojmë dhe vazhdimisht jemi në kontakte me organet e policisë, me qëllim që këto kushte të përmirësohen.

          Gazetarja : Zoti Dobjani ju faleminderit.

          Z. Ermir Dobjani : Faleminderit dhe juve.