Gazeta "SHEKULLI" , 22 Korrik 2005

Dobjani: Mos dëboni shqiptarët nga Gjermania

- Kërkesa i është bërë 29 deputetëve gjermanë

që kanë ardhur të shohin kushtet e jetesës në Shqipëri - 

T I R A N Ë  – Avokati i Popullit, Ermir Dobjani, i kërkon një grupi prej 29 deputetësh të Landit të Hessenit të Gjermanisë të mos dëbojnë shqiptarët taksapagues të rregullt. Në kërkesën e tij, Dobjani është fokusuar më shumë tek personat q­ë janë në gjakmarrje, homoseksualët si dhe gratë e divorcuara me fëmijë. “Shteti shqiptar nuk mund t’a mbrojë jetën e një personi që është në gjakmarrje. E them me keqardhje edhe se në Shqipëri nuk respektohen të drejtat e homoseksualëve dhe ata shikohen me përbuzje e diskriminohen nga opinioni”, - ka kërkuar Ermir Dobjani duke mbështetur kërkesat e këtyre kategorive të azil-kërkuesve në shtetin gjerman. Këto kërkesa, Dobjani i bëri dje në takimin me një grup prej 29 deputetësh gjermanë të Komisionit të Peticioneve pranë Parlamentit të Landit të Hessenit, të kryesuar  nga Sekretarja e Shtetit në Ministrinë për Punët e Brendshme dhe Sportin, Oda Scheibelhuber. Takimi u kërkua nga grupi i deputetëve gjermanë, në kuadrin e një misioni që ata kanë ndërmarrë në rajonin e  Ballkanit, për t’u njohur më mirë me realitete konkrete që ofrojnë Shqipëria, Kosova dhe  Maqedonia, lidhur kjo, me numrin relativisht të madh, të emigrantëve në shtetin gjerman.

Kërkesat

Në fjalimin e tij, drejtuar miqve gjermanë, Dobjani ka kërkuar favorizimin edhe të grave të divorcuara e me fëmijë, duke thënë shprehimisht “se u duhet dhënë leje personave që e kërkojnë këtë për shkak të gjakmarrjes, të orientimit të tyre seksual, pra të homoseksualëve, si dhe të grave të divorcuara”. Sipas njoftimit për shtyp të Zyrës së Marrëdhënieve me Publikun pranë Avokatit të Popullit, Dobjani u është përgjigjur më tej të gjitha interesave që shprehnin të huajt në lidhje me kompetencat dhe funksionimin që ky institucion ka në vendin tonë. Por në lidhje me problematikën e takimit të deputetëve gjermanë, Avokati i Popullit, është shprehur se “Ndër shumë arsye që mund të parashtrojë një azilkërkues në Gjermani, duhet konsideruar se në Shqipëri nuk ka mohim, apo shkelje të të drejtave dhe lirive themelore të individit, vetjake apo politike, si liria e fjalës, e besimit, e zgjedhjeve, mediave, organizimit, lëvizjes së lirë”. Pasi ka pasqyruar këtë gjendje në vendin tonë, Dobjani sqaroi më në detaje edhe pozicionin e tri kategorive për të cilat u kërkoi më shumë vëmendje deputetëve gjermanë. Në lidhje me personat në gjakmarrje, homoseksualët dhe gratë e divorcuara, Avokati i Popullit u shpreh se “kushtet social-ekonomike, të cilat i kanë detyruar ata të largohen nga Shqipëria, nuk kanë ndryshuar aq, sa për t’i kthyer ata këtu, në vendin e tyre”. “Konsideroni se shumë prej tyre nuk kanë as punë dhe as shtëpi këtu”, - shtoi Dobjani duke theksuar më tej edhe nevojat e tjera familjare që në Shqipëri këta kategori nuk mund t’i kenë të garantuara si shkollimi i fëmijëve. “Dëbimi me forcë do të shkaktonte trauma tek ata fëmijë të përfshirë në sistemin arsimor gjerman si edhe tek familjarët e tyre”, - tha Dobjani.

Gjermanët

Grupi i përbërë prej 29 deputetësh gjermanë të Komisionit të Peticioneve pranë Parlamentit të Landit të Hessenit, të kryesuar nga Sekretarja e Shtetit në Ministrinë për Punët e Brendshme dhe Sportin, Oda Scheibelhuber, që kishte mbërritur në vendin tonë me një inisiativën e tij për të njohur më mirë realitetet që ofrojnë vendet e Ballkanit si Shqipëria, Kosova dhe Maqedonia. Një vizitë të tillë “verifikuese” të gjendjes reale që i pret emigrantët e dëbuar, deputetët gjermanë e kishin ndërmarrë në kuadër të kufizimeve që kanë sjellë ligjet e reja gjermane për legjitimimin e qëndrimit të mëtejshëm të shtetasve të huaj atje. Ata do të shqyrtojnë të gjitha problemet që ka vendi ynë për të pasur edhe vetë një kuadër  më të qartë të situatës. Më pas, grupi i deputetëve gjermanë do të përpilojë edhe disa kërkesa, të cilat do t’ia parashtrojnë parlamentit gjerman. Në përfundim të fjalës së tij, Avokati i Popullit, Dobjani theksoi edhe se në kërkesat e tij nuk përfshihen personat problematikë. “Kur them këtë nuk kam parasysh individët problematikë të lidhur me krimin, por ata familjarët, të cilët janë  në kërkim të punësimit dhe të një jete të ndershme, duke kontribuar si taksapagues në vendin tuaj. Unë flas për të gjithë ata njerëz që kanë dokumenta të rregullta dhe zhvillojnë një jetë normale në Gjermani”, - përfundoi Dobjani parashtrimin e situatës reale që i kërkuan 29 deputetët e Landit të Hessenit.