Gazeta Shqiptare , 13 Janar 2006

DOBJANI: SIMBOLET FETARE PA LEJE

DUHET TË PRISHEN

Propozimi: Lejet e ndërtimit për objekte fetare

t’i miratojë KRRTRSH

“Simbolet fetare të ngritura pa leje duhet të prishen”. Në vorbullën e shqetësimit të ngritur pas rrëzimit pak ditë më parë të një kryqi në komunën e Bushatit, Avokati i Popullit Ermir Dobjani nuk ka zgjedhur vetëm fjalët qetësuese dhe inkurajuese për ruajtjen e tolerancës por ka prekur një nga pikat që kohët e fundit po nxit problemet mes feve në Shqipëri. “Policia Ndërtimore duhet të zbatojë pa hezitim ligji dhe të prishë çdo simbol fetar të ngritur pa leje, qoftë në Shkodër, Sarandë, Elbasan, apo gjetkë”, ka deklaruar dje Dobjani duke përmendur pikërisht ato zona ku janë shfaqur probleme të këtij lloji. I ndërgjegjshëm për natyrën delikate të çështjes ajo më kot “I rekomandon edhe drejtuesve fetarë të bashkëpunojnë me policinë ndërtimore” për prishjen e çdo simboli të vendosur pa leje.

Ndryshimi i Ligjit

Avokati i Popullit nuk ka mbetur vetëm në propozimin e kësaj forme e cila do të mund të tingëllonte “radikale” për ndonjërën prej besimeve fetare, por ka propozuar rregullimin e kësaj gjendjeje duke ndryshuar ligjet të cilat të drejtën e dhënies së lejeve ia njohin pushtetit vendor. Situatë nga e cila në të vërtetë kanë gjeneruar konfliktet, pasi është shumë e lehtë që një komunë katolike, fqinje me një tjetër muslimane t’i japë të drejtën vetes të ndërtojë një kryq në majë të një kodre, apo anasjelltas fshati musliman të vendosë një simbol të vetin. Për të shmangur pikërisht një situatë të tillë Dobjani shpjegon se pak ditë më parë ka vënë në dijeni Kryeministrin për një rekomandim të tijin për nxjerrjen e një ligji të ri ose plotësimin e atij ekzistues për dhënien elejeve të ndërtimit për objektet fetare. “Proçedura e dhënies së lejes për ndërtime të tilla, dokumentacioni që duhet të plotësohet dhe organi që duhet të jetë kompetent për miratimin e lejes së ndërtimit duhet tëjetë Këshilli i Rregullimit të Territorit të Republikës pasi të ketë marrë dhe mendimin e Komitetit të Kulteve”, rekomandon Dobjani i cili e bazon atë në një nga nenet e Kushtetutës. Sipas tij, “pasojat e aktit të dënueshëm” të rrëzimit të kryqit “bëhen më të rënda po të kemi parasysh faktin se incidente të tilla po shënojnë përsëritje të kohëpaskohëshme”.

Polemikat

Në të vërtetë polemikat për çështje të tilla kanë ngritur krye në mënyrë të përsëritur. Edhe në reagimin e tij kreu i Kishës Katolike imzot Rrok Mirdita, megjithëse me tone që synonin të ulnin gjakrat, nuk harroi të kujtonte se për Kryqin në Bushat para se të rrëzohej kishte dalë me një deklaratë publike Myftinia e Shkodrës. Ashtu sikurse kreu i Komunitetit Musliman, i cili e dënoi aktin, nuk la pa përmendur edhe një herë se “nuk ishte e arsyeshme rivendosja e kryqit”, ndërkohë që i bëri thirrje myftinive në rrethe që megjithatë, në çdo rast të mos reagonin me ashpërsi, por të zbusnin situatën.

Në këto kushte, kur deklaratat e solidaritetit dhe thirrjet për harmoni nuk e kanë peshën e duhur pasi ndodh një incident, propozimi i Avokatit të Popullit duket më i arsyeshmi për të evituar përsëritjen e ngjarjeve të tilla dhe më pas rikujtesat për bashkëjetesën mes feve.