FJALA E AVOKATIT TË POPULLIT Z. ERMIR DOBJANI NË KONFERENCËN ME TEMË: 

“BASHKËPUNIMI I GJYKATËS KUSHTETUESE ME OMBUDSMANIN NË MBROJTJE TË TË DREJTAVE TË NJERIUT”

Erevan - Armenia, 5-6 tetor 2007

Të dashur kolegë,

Zonja dhe zotërinj

Së pari, unë dëshiroj të falenderoj organizatorët për ftesën e pjesëmarrjes në këtë Konferencë me temë interesante dhe t’i falenderoj ata për mikpritjen e tyre.

Pasi dëgjuam anëtarin e Gjykatës Kushtetuese të Republikës së Shqipërisë, zotin Kujtim Puto, dëshiroj të them edhe unë disa fjalë në këtë Konferencë.

Avokati i Popullit në Shqipëri, qysh në vitin 2000 i kërkoi Gjykatës Kushtetuese të bëjë interpretimin e nenit 134 të Kushtetutës Shqiptare, se çfarë do të konsiderohej “interesi i tij”. Gjykata Kushtetuese në vitin 2000 bëri një interpretim të mirë. Interpretimi sqaronte se interesi i Avokatit të Popullit nuk ishin vetëm çështjet që lidhen me statusin, pagën e tij etj, por interesi ishin edhe të drejtat dhe liritë e individëve që ankoheshin pranë tij. Por në praktikë, më vonë në 2 çështje Gjykata Kushtetuese, sikur e tha kolegu im, zoti Puto, e ngushtoi këtë interpretim dhe rrëzoi dy kërkesa të Avokatit të Popullit për mungesë legjitimiteti. Ju e dini se për gabimet e Gjykatës Kushtetuese nuk mund të ankohesh. Vetëm Gjykata Kushtetuese mund t’i ndreqë vetë gabimet e saj. Kështu që tani jemi para ndreqjes së gabimit të saj që ndaloi Avokatin e Popullit të bënte kërkesë për të shpallur si antikushtetuese disa ligje të Parlamentit të Shqipërisë.

Gjatë 8 vjetëve Avokati i Popullit ka bërë 9 kërkesa në Gjykatën Kushtetuese. Nga këto 3 nuk janë pranuar, 4 janë pranuar. Nga këto është shfuqizuar një ligj i Parlamentit dhe 6 Vendime të Qeverisë. Vetëm me një kërkesë të bërë nga Avokati i Popullit në shkurt 2006, u shfuqizuan tre vendime të Qeverisë që shkelnin të drejtat e njeriut, sepse njerëzit largoheshin nga puna (në fakt për arsye politike), duke ju shkelur të drejtat e tyre kushtetuese.

Mendimi im është që në vendet ish socialiste, Ombudsmani duhet të ketë të drejtë t’i drejtohet Gjykatës Kushtetuese. Gjithashtu Gjykata Kushtetuese duhet të jetë dashamirëse me kerkesat e bëra nga Ombudsmani.

Në Konferencën e zhvilluar në Lubjana në nëntor 2001, u Rekomandua që duhet të zgjerohet roli i Ombudsmanit para Gjykatës Kushtetuese.

Kjo është shumë e vlefshme për vendet tona për të thelluar demokracinë dhe për të mbrojtur të drejtat e njeriut.

Faleminderit për vëmendjen.

AVOKATI I POPULLIT

Ermir DOBJANI